Joriy yilning 8-may kuni Angliya chempionatining 37-turida “Tottenhem” jamoasi o‘ziga tegishli “Uayt Xart Leyn” stadionida “Sautgempton” futbolchilarini qabul qilib, 1:2 hisobida yengildi. London klubi safida Son Xyon Min hisobni ochgan bo‘lsa, “avliyolar” a’zosi Stiven Devis dubl bilan javob qaytardi. “Tottenhem” so‘nggi tur oldidan ikkinchi o‘rinni egallagan holda ikki ochkolik farq bilan “Arsenal”ni ortda qoldiratyogan edi.
Ammo bularning barchasi ahamiyatga ega emas. Umuman, mutlaqo muhim emas. “Chempionat” nashri mazkur uchrashuvning tanaffus vaqtida ro‘y bergan muhim hodisa haqida hikoya qilib berdi.
8-may kuni “Uayt Xart Leyn” stadionida yuz bergan eng muhim voqea tanaffus vaqtida sodir bo‘ldi. 8 yoshli Marshall Jenson “Tottenhem”ning zaxira o‘yinchilari bilan futbol o‘ynadi. Bolakayning na oyoqlari va na qo‘llari bor.
Shunga qaramay, u futbol o‘ynashni yoqtiradi. Marshall atigi bir yasharligida meningit xastaligi tufayli uning ikkala qo‘li va oyoqlari amputatsiya qilingan edi. Ammo bolakay va uning ota-onasi taslim bo‘lmadi. “Marshall uni baxtsiz va mahkum deb hisoblashlarini yomon ko‘radi. U juda baxtli bola! Ha, uning tanasi boshqalarnikiga o‘xshash emas. Lekin u hayotdan zavq olishni biladi”, – deydi bolakayning 36 yoshli onasi Stefani.
Bolakay 2012-yilning mart oyidan boshlab Angliyada shuhrat qozona boshladi. Aynan o‘sha yili uning oilasi Facebook’da Handstand The Appeal For Marshall Janson guruhini yaratdi. Unda Marshallning mashhur insonlar bilan uchrashuvi va turli shoulardagi ishtirokidan fotosuratlari joylanishi bilan birgalikda, eng asosiysi, uning davolanishi uchun mablag‘ yig‘iladi. Bolakayning baxtiga uning miyasi jarohatlanmagan. Ammo Jensonga har yili, u 18 yoshga to‘lguniga qadar yangi qo‘l va oyoq protezlari kerak bo‘ladi. Bu g‘alati eshitilishi mumkin, biroq bu haqiqat. Buning uchun har yili 50–60 ming funt sterling zarur.
Marshallning da’volanishi uchun pulni doim izlashadi va bu jarayon muvaffaqiyatli bo‘ladi. Jensonga oddiy va “g‘ayrioddiy” insonlar yordam qo‘lini cho‘zadi. Masalan, 2 yil avval amerikalik qoidasiz janglar kurashchisi, aktyor, tadbirkor Xalk Xogan bolakayning davolanishi uchun 500 ming dollar hadya qildi.
Mana to‘rt yildirki butun Buyuk Britaniya Marshallning jon saqlab yurishini kuzatmoqda – aniqrog‘i, uning doimo futbol o‘ynab, to‘laqonli hayot kechirayotganini. Bir vaqtlar Jensonlar oilasiga yaqin insonlardan biri Marshallning “Tottenhem” futbolkasida futbol o‘ynab gol urgan va chiroyli raqs bilan nishonlagan vaziyatini videoga olib, uni ijtimoiy tarmoqqa joyladi.
Bir necha oy o‘tib, “shporlar” Marshallning orzusini ro‘yobga chiqardi – u “Uayt Xart Leyn” stadioniga qadam bosdi. Shunchaki emas, balki sevimli jamoasi bo‘lgan “Tottenhem” futbolchilari Naser Shadli, Tom Kerroll va boshqalar bilan chigalyozdi mashqlarini o‘tkazdi.
Bolakay haqiqiy superyulduz sifatida kutib olindi. Avvaliga Jenson maydon chetida intervyu berdi.
— Marshall, bu yerda sening hamma do‘stlaring yig‘ilgan. 36 ming muxlis seni qo‘llab-quvvatlayapti, o‘zingni qanday his qilyapsan?
– Awesome! (Ajoyib! – “Daryo” tarjimasi) – bolakayning javobi stadion muxlislarining olqishlari ichiga sho‘ng‘ib ketdi.
Jensonni maydonga Musa Dembele olib chiqdi. “Rostini aytganda, qiyinchilik bilan ko‘z yoshlarimni ushlab turgandim. Bunday insonlarni ko‘rganingda, sening xaraktering bir tiyinga qimmat ekanini tushunib yetasan. Chunki bu bolakay bizlardan ancha kuchli, har birimizdan yaxshiroq. U haqiqiy qahramon!”, – dedi bolakayning hayotidan ta’sirlangan belgiyalik yarim himoyachi.
Marshallning har bir harakatini maydon suxandoni sharhlab bordi. “Devisga aniq uzatma! Qanday texnika, qanday to‘p nazorati! Marshallning ideal pasiga nazar tashlang! Fantastika, shunchaki fantastika”, – mana shu ovozlar ostida futbol mahoratini ko‘rsatdi bolakay.
“Men kuchli hayajonda edim. Bilasizmi, Angliya Premyer-ligasi uchun yasalgan to‘plar katta, og‘ir... Lekin, o‘z ishimni uddalay oldim, deb o‘ylayman”, – dedi Marshall.
“Uayt Xart Leyn” stadionida o‘tkazilgan bir necha ajoyib soatlar ichida Jenson nafaqat to‘p bilan o‘ynadi, balki bir nechta foydali ishlarni ham amalga oshirdi. “Men shuncha dastxatlar oldimki... Ba’zi futbolchilar protezlarimga o‘z imzosini tushirdi! Ha aytgandek, birinchi bo‘lib oldimga Maurisio Pochettino (“Tottenhem” bosh murabbiyi – “Daryo” izohi) keldi. U meni quchoqlab, o‘pib qo‘ydi. Men esa, nihoyat, uning familiyasini to‘g‘ri talaffuz qilishni o‘rganib oldim!”, – dedi Marshall.
Marshall uchun hayotidagi eng yaxshi kunni tashkil qilib bergan “Tottenhem” klubi bu bilan to‘xtab qolmadi. Bolakay jamoa bazasiga taklif qilindi.
U o‘zining singlisi Leksi va yana ikkita bolakay bilan sevimli jamoasining mashg‘ulotini kuzatibgina qolmay, bevosita o‘zi ham unda ishtirok etdi. Marshall birin-ketin gollar kirita boshladi, uning driblinglariga na Yan Vertongen va na Tobi Alderveyreld qarshilik ko‘rsata oldi.
“Bu bolakaydan to‘pni olishning imkoni yo‘q! U Eden Azar (“Chelsi” yarim himoyachisi – “Daryo” izohi)dan mahoratliroq!”, – deb ma’lum qildi “hayotidagi eng qiyin mashg‘ulotlardan birini” o‘tkazgan Vertongen.
Izoh (0)