Халқаро футбол федерацияси (ФИФА) конгресси ташкилот Ижроия қўмитаси томонидан тасдиқланиши керак бўлган, 2015–2018 йилларга мўлжалланган бюджетини маъқуллади. Бюджетнинг умумий суммаси 1,417 миллиард долларни ташкил қилади, деб хабар бермоқда «ТАСС».
Умумий суммадан 1,151 миллиард доллари тўғридан-тўғри футбол ассоциацияларига, 249 миллион доллар конфедерацияларга, яна 26 миллион доллар минтақавий ассоциацияларга ажратилади.
2017 йилда ФИФАнинг бюджети 1,3 миллиард долларни ташкил қилади.
Шунингдек, ФИФА ташкилотнинг 2015 йилги молиявий ҳисоботини маъқуллади. Африка футбол конфедерацияси раҳбари Исса Ҳаятунинг таъкидлашича, ФИФАнинг харажатлари 2002 йилдан буён илк маротаба даромадидан ошиб кетди. 2015 йилда ташкилот 122 миллион доллар зарар кўрди. Ташкилотнинг 2011 йилга нисбатан даромади 82 миллиондан 1,152 миллиард долларга ўсди. Даромаднинг асосий қисми ФИФА байроғи остида ўтказилган мусобақаларнинг телетрансляциялар ҳуқуқи сотувидан тушди. Шунингдек, харажатлар ҳам ошган: 2011 йилда хажаратлар 240 миллион долларни, 2015 йилда эса 1,274 миллиард долларни ташкил этди.
ФИФАнинг молиявий ҳолати соғлом дея баҳоланди. Бу ҳақда ташкилотнинг молиявий директори Маркус Каттнер конгресс олдидаги нутқи давомида маълум қилди.
«Ўтган йил осон бўлмаганига қарамай, ФИФАнинг ҳозирги ҳолати соғлом. Янги президент сайлангани ва ислоҳотларнинг татбиқ қилингани эвазига ташкилотнинг молиявий ҳолати барқарор бўлади», – деб таъкидлаган Каттнер ФИФА 74 фоиз маблағни футбол ривожи учун сарфлаганини маълум қилди.
Изоҳ (0)