8 май куни эстрада ва кино юлдузлари иштирокида «Менинг Тошкентим» мюзикли премерасига бағишланган тадбир бўлиб ўтди. Бу ҳақда мюзикл ташкилотчилари «Дарё» нашрига маълум қилди.
Тадбир иштирокчилари Тошкентнинг кўзга кўринган обидалари — «Шаҳидлар хотираси» ёдгорлик мажмуи, «Минор» масжиди, Ҳазрати Имом мажмуаларини икки қаватли автобусда зиёрат қилди. Энг сўнгги бекат — мюзикл бош ҳомийси Murad Buildings компанияси томонидан қурилган «Гулсарой» турар-жой мажмуасида кичик шоу-дастур намойиш этилди.
«Истиқлол» санъат саройида 13—15 май кунлари намойиши этилиши режалаштирилган «Менинг Тошкентим» мюзиклида Фотима Режаметова, Муҳаммадисо Абдулхаиров, Ҳасан ва Ҳусан Солиҳовлар, Озодбек Назарбеков, Карен Гафуржанов, Жасур Мирсоатов, Матин, «ВИА Шарқ», «Садо» гуруҳлари каби хонандалар, актёрлар, режиссёр ва бастакорларлар қатнашади.
Сценарийда қадимий ва ҳамиша навқирон шаҳарнинг бир маҳалла аҳли мисолидаги ҳаёти — орзу ва қувончлари, муҳаббат ва оила, шодлик ва хаяжонлари акс эттирилган. «Менинг Тошкентим» мюзиклида ретро мусиқалар замонавий талқинда ижро этилади, оригинал рақслар, ёрқин костюмлар, реалистик саҳна безаклари билан бойитилади.
Ташкилотчилар «Менинг Тошкентим» мюзикли Тошкентнинг «ташриф қоғози» бўлиб қолишига ва мухлислар қалбидан ўрин эгаллашига умид қилмоқда. «Бир кунини севимли шаҳрига бағишлашни мақсад қилган санъаткорлар Тошкент аҳли ва меҳмонлари учун ўзига хос намуна бўла олади», — дейди тадбир ташкилотчилари.
Изоҳ (0)