Европа Чемпионлар Лигаси беллашувлари яқин келажакда дам олиш кунлари ўтказилиши мумкин

Футбол бўйича Европа Чемпионлар Лигаси учрашувлари яқин келажакда дам олиш кунларида ўтказилиши мумкин. Бу ҳақда «ТАСС» Times нашрига асосланиб хабар берди.

Чемпионлар Лигаси ўйинларининг шанба ва якшанба кунларида ўтказилиши, унга бўлган қизиқишнинг янада ошишига олиб келади, деб таҳмин қилинмоқда. Маълумки, Европа Чемпионлар Лигаси учрашувлари сешанба ва чоршанба кунларида, Европа Лигаси ўйинлари эса пайшанба кунида бўлиб ўтади.

Нашрнинг маълум қилишича, УЕФА яқин 5 йил ичида янги режани амалга тадбиқ қилиш ҳақида бош қотирмоқда. Бу вақт давомида Европа миллий чемпионатлари ўз режаларига ўзгариш киритиш имконига эга бўлади. Боиси, дам олиш кунлари Европада миллий чемпионат ўйинлари ўтказилади.

Маълумот учун, Чемпионлар Лигасининг 2015/16 йилги финали 28 май куни Милан шаҳрида бўлиб ўтади ва унда Мадриднинг иккита жамоаси — «Реал» ҳамда «Атлетико» бош соврин учун кураш олиб боради.