«Лестер» чемпионлиги муносабати билан клуб хўжайини ҳар бир футболчига Mercedes совға қилади

«Лестер» клуби хўжайини Вишай Шривадданапрабха жамоа Англия чемпиони бўлгани муносабати билан ҳар бир футболчига Mercedes автомобилини совға қилади ҳамда Лас-Вегасга саёҳат сафарини тўлаб беради. Бу ҳақда Daily Mail нашрига таяниб, «ТАСС» хабар бермоқда.

• Расман: «Лестер» клуби ўз тарихида биринчи бор Англия чемпионлигини қўлга киритди

Daily Mail’нинг маълум қилишича, ҳар бир футболчи баҳоси 32 670 минг фунт стерлингга тенг Mercedes B-Class Electric Drive русумли автомобилига эга бўлади. Шривадданапрабха автомобиллар учун 1 миллион фунт стерлинг атрофида маблағ сарфлайди.

2 майга ўтар кечаси Англия чемпионати 36-тур сўнгги ўйинида «Челси» ўз майдонида «Тоттенҳэм» билан жанговар дуранг (2:2) қайд этиб, «Лестер»нинг турнир якунланишига икки тур қолганида чемпион бўлишига замин яратди. «Лестер» Англия чемпионлигини қўлга киритган 24-клуб бўлди.

• Жаҳон матбуоти «Лестер» эртаги ҳақида нима деб ёзмоқда?

Ўтган мавсумда «Лестер» Найжел Пирсон қўли остида Англия чемпионатини 14-ўринда якунлаган эди. Клубнинг аввалги энг юқори натижаси 1928/29 йилги мавсумда қайд этилган бўлиб, жамоа Англиянинг биринчи лигасида иккинчи ўринни эгаллаган эди.

• ФИФА, Италия бош вазири ва бир қатор Европа клублари «Лестер»ни чемпионлик билан табриклади

Англия чемпиони бўлган «Лестер» 93 миллион фунт стерлингдан зиёд мукофот пули ишлаб олади. «Тулкилар» учрашувларнинг телетрансляция ҳуқуқи сотувидан 54 миллион, Sky ва BT Sport телеканаллари 16 та ўйинни телевидениеда намойиш қилганлиги учун 14 миллион фунт даромад кўради. Чемпионатдаги ғалаба учун «Лестер» 25 миллион фунтни бонус сифатида қўлга киритади.