“Lester” chempionligi munosabati bilan klub xo‘jayini har bir futbolchiga Mercedes sovg‘a qiladi

“Lester” klubi xo‘jayini Vishay Shrivaddanaprabxa jamoa Angliya chempioni bo‘lgani munosabati bilan har bir futbolchiga Mercedes avtomobilini sovg‘a qiladi hamda Las-Vegasga sayohat safarini to‘lab beradi. Bu haqda Daily Mail nashriga tayanib, “TASS” xabar bermoqda.

• Rasman: “Lester” klubi o‘z tarixida birinchi bor Angliya chempionligini qo‘lga kiritdi

Daily Mail’ning ma’lum qilishicha, har bir futbolchi bahosi 32 670 ming funt sterlingga teng Mercedes B-Class Electric Drive rusumli avtomobiliga ega bo‘ladi. Shrivaddanaprabxa avtomobillar uchun 1 million funt sterling atrofida mablag‘ sarflaydi.

2-mayga o‘tar kechasi Angliya chempionati 36-tur so‘nggi o‘yinida “Chelsi” o‘z maydonida “Tottenhem” bilan jangovar durang (2:2) qayd etib, “Lester”ning turnir yakunlanishiga ikki tur qolganida chempion bo‘lishiga zamin yaratdi. “Lester” Angliya chempionligini qo‘lga kiritgan 24-klub bo‘ldi.

• Jahon matbuoti “Lester” ertagi haqida nima deb yozmoqda?

O‘tgan mavsumda “Lester” Nayjel Pirson qo‘li ostida Angliya chempionatini 14-o‘rinda yakunlagan edi. Klubning avvalgi eng yuqori natijasi 1928/29-yilgi mavsumda qayd etilgan bo‘lib, jamoa Angliyaning birinchi ligasida ikkinchi o‘rinni egallagan edi.

• FIFA, Italiya bosh vaziri va bir qator Yevropa klublari “Lester”ni chempionlik bilan tabrikladi

Angliya chempioni bo‘lgan “Lester” 93 million funt sterlingdan ziyod mukofot puli ishlab oladi. “Tulkilar” uchrashuvlarning teletranslyatsiya huquqi sotuvidan 54 million, Sky va BT Sport telekanallari 16 ta o‘yinni televideniyeda namoyish qilganligi uchun 14 million funt daromad ko‘radi. Chempionatdagi g‘alaba uchun “Lester” 25 million funtni bonus sifatida qo‘lga kiritadi.