Токиода трамвай 1903 йили иш бошлаган бўлиб, ўз тараққиётининг чўққисида шаҳарда 213 киломтер трамвай йўли, 41 та трамвай йўналиши мавжуд эди, у ҳар куни 1,5 миллион йўловчига хизмат кўрсатарди, деб ёзади блогер Илья Варламов. Бироқ автомобиллар сони кўпайиши ва шаҳар кўчаларининг торлиги сабаб, у самарадорлик бўйича автобус ва метрога имкониятни бой берди. 1967—1972 йиллар мобайнида шаҳарда 181 километр трамвай йўли демонтаж қилинди.
Токиода трамвайнинг тугатилиши анъанавий хайрлашув маросимлари ва трамвайга қаратилган таъсирли хайрлашув сўзларисиз бўлиши мумкин эмас эди. 1967 йили олинган қуйидаги суратларда трамвай билан хайрлашаётган токиоликлар акс этган:
«Садоқатли хизматинг учун раҳмат, ҳурматли трамвай!».
SONY биносидаги ёзув: «Хайр, трамвай».
Ҳозир Токиода фақат битта — Аракава трамвай йўналиши мавжуд. У ҳам ёпилиб кетиши мумкин эди, бироқ шаҳар аҳолисининг талаби билан сақлаб қолинган ва 1974 йили Токио транспорт бюроси бошқарувига топширилган.
Йўналишнинг узунлиги 12,5 километр бўлиб, унинг энг эски бўлаклари 1913 йилда қурилган. Трамвайлар 30 бекатдан иборат йўналишни 50 дақиқада босиб ўтади.
Трамвай — шунчаки бир ҳудудий транспорт эмас, балки ўтмишга кўрсатилган ҳурмат белгиси ва эски Токио руҳини сақлаб қолиш йўлидаги бир уринишдир. Мазкур аттраксион саёҳатчини Токионинг замонавий туманларига ўхшамас бошқа — самимийроқ томонига оҳиста олиб киради.
Баъзи жойларда трамвай уйлардан бир неча сантиметр беридан ўтган бўлиб, оддий токиоликларнинг турмушига бир назар ташлаш учун йўловчида зўр имконият ҳосил бўлади. Бу каби кўҳна даҳаларда асосан кексалар — айнан анъанавий японча ҳаёт тарзини олиб борувчи кишилар истиқомат қилади. Шунингдек, трамвай хиёбон ва қабристонлар орасидан, оилавий дўкончалар ва ҳунармандчилик устахоналари жойлашган тор кўчалардан ўтади.
Трамвай саёҳатчилар орасида анча оммабоп. Унинг фаолияти катта фойда келтирмаса-да, маъмурият ҳар ҳафта турли тадбир ва фестиваллар ташкил этиш билан трамвайни қўллаб-қувватлашга ҳаракат қилади. Бундан ташқари, ақлга сиғиши мумкин бўлган ҳар турли трамвай-сувенирларни — хоҳланг вагон кўринишидаги ширинлик, истасангиз трамвайнинг кичик моделини харид қилиш мумкин.
Эски даврларга хос муҳитни сақлаб қолиш мақсадида, Токиода замонавий трамвайлардан фойдаланилмайди. Энг эски трамвай моделлари ҳам 1954 йилдан бери ўзгартирилмаган, янгиларининг (2009 йилда йўлга туширилган) ҳам кўриниши эски трамвайларга хос услубда. Бир жуфт ретро-трамвай ҳам бор, бекатлардан биридан эса «Хотиралар майдони» мавжуд — бу ерда хизматини ўтаб бўлган трамвайларни томоша қилиш мумкин.
Трамвайлар ва бекатларнинг ташқи кўринишида ўтмиш белгиларини сақлаб қолишга ҳаракат қилингани билан, бекатлар ҳам, трамвайларнинг ўзи ҳам энг замонавий япон стандартлари бўйича жиҳозланган. Ҳар бекатда ҳожатхоналар, йўл кўрсаткичлар, ахборот тахталари, имконияти чекланган кишилар учун шарт-шароит, вагонга ногиронлик аравачасида кириш ва чиқиш учун пандус кабилар бор.
Япониядаги ҳар қандай жамоат транспортида бўлгани каби, трамвайда ҳам мобил телефонда гаплашиш номақбул ҳаракат ҳисобланади.
Мамлакатда ҳамма трамвайлар ҳам хотира рамзи вазифасини ўтамайди. Кўплаб шаҳарларда кўриниши жуда замонавий трамвайлар қатнайди. Масалан, Саппорода:
Тояма
Хиросима
Изоҳ (0)