Зилзила эпицентри Қашқар ва Лабзак маҳаллалари ўрнида бўлиб, вертикал зарблар кучининг магнитудаси 5,3 га тенг, силкиниш 8 баллдан зиёд бўлган.
Зилзила 10—12 сония давом этган.
Ўша йили 10 майга ўтар кечаси, 24 май, 5 июнь кунлари ҳам кучли (6—7 балли) ер силкинишлари такрорланган.
Зилзила натижасида 2 миллион квадрат метрдан зиёд турар жой, 236 маъмурий бино, 180 га яқин ўқув юрти, 185 тиббиёт ва 245 саноат корхонаси бинолари зарар кўрган.
Ерости силкинишлари натижасида 78 минг киши бошпанасиз қолган, расмий маълумотларга кўра, 8 киши ҳалок бўлган.
Зилзиладан кейинги кундаёқ шаҳар кўчалари ва майдонларида чодир-шаҳарлар пайдо бўлди, сув ва электр таъминоти узлуксизлиги таъминланди ва шу сабабли ҳам хавфли эпидемиялар тарқалиши олди олинди.
Қайд этишларича, вайронагарчилик кунларида шаҳарда бирор марта таловчилик (мародёрлик) ҳаракатлари қайд этилмаган.
Қарийб 15 минг оила ўз хоҳишига кўра Ўзбекистоннинг ва собиқ Иттифоқнинг бошқа шаҳарларига кўчирилган.
Тошкент 3,5 йил ичида қарийб қайта қурилди — шаҳар чеккаларида янги турар жой мавзелари қад ростлади, бутун бошли янги бир туман шаҳарга қўшилди.
Тошкентда кейин ҳам бир неча бор кучли зилзилалар юз берди, бироқ 1966 йилги қимматли сабоқ кенг миқёсли вайронагарчиликлар ва қурбонларнинг олдини олиш имконини берди.
Изоҳ (0)