Футбол бўйича Осиё Чемпионлар Лигаси гуруҳ босқичининг 5-тур беллашувларига якун ясалди.
Турнирнинг «А» гуруҳида иштирок этаётган Тошкентнинг «Локомотив» клуби БААда «Ан-Наср» меҳмони бўлиб, 1:1 ҳисобида дуранг ўйнади. Қўлга киритилган 1 очко «темирйўлчилар»га гуруҳ пешқадамлигини сақлаб қолиш имконини берди.
«Локомотив» сўнгги турни ўз майдонида «Ан-Наср»га қарши ўтказади. Ўша учрашувдаги дуранг натижа ҳам Тошкент клубини тарихда биринчи бор Осиё Чемпионлар Лигасининг нимчорак финалига олиб чиқади.
Пойтахтнинг бошқа бир клуби «Бунёдкор» эса халқаро майдонни муддатидан олдин тарк этди. Қаторасига иккинчи мавсумда Сергей Лушчан клубни гуруҳ босқичидан муваффақиятли олиб ўтолмади.
Қайд этиш керак, Осиё Чемпионлар Лигасининг Тошкентда бўлиб ўтган сўнгги олти ўйинида «Бунёдкор» рақибларини нафақат мағлуб эта олмади, балки битта ҳам гол уришнинг уддасидан чиқмади.
Шу тариқа клуб ўз тарихида навбатдаги антирекордни ўрнатиб, 540 давомида ўз майдонида Осиё клублари дарвозасига йўл топа олмади. Сўнгги тур натижасидан қатъий назар «Бунёдкор» Чемпионлар Лигасининг навбатдаги босқичига чиқа олмайди.
Осиё Чемпионлар Лигаси «А» гуруҳи. 5-тур 20 апрель, чоршанба
«Ан-Наср» (БАА) — «Локомотив» (Ўзбекистон) 1:1
Голлар: Жирес Кембо Экокко, 31 (1:0). Темурхўжа Абдухолиқов, 43 (1:1).«Локомотив»: Игнатий Нестеров, Олег Зотеев, Салим Мустафоев, Ислом Тўхтахўжаев (Сергей Прохоров, 46), Шерзод Файзиев, Сервер Жепаров, Тимур Кападзе, Санжар Шоаҳмедов, Марат Бикмаев, Темурхўжа Абдухолиқов (Иван Нагаев, 86), Сардор Мирзаев (Жасур Ҳасанов, 73).Осиё Чемпионлар Лигаси «В» гуруҳи. 5-тур 20 апрель, чоршанба
«Бунёдкор» (Ўзбекистон) — «Лаҳвия» (Қатар) 0:2
Голлар: Карим Будиаф, 65 (0:1). Муҳаммад Мунтари, 79 (0:2).«Бунёдкор»: Мурод Зухуров, Акмал Шораҳмедов, Юрица Булят, Акром Комилов, Рустам Ашурматов, Жавлон Иброҳимов, Отабек Шукуров (Шакер Зуаги, 69), Сато Минори, Элдор Шомуродов, Баҳодир Насимов (Шаҳзод Нурматов, 46), Достон Ҳамдамов (Забиҳилло Ўринбоев, 78).
Изоҳ (0)