Ўзбекистон халқ артисти Озодбек Назарбеков Россияга ишлашга кетган муҳожирлар қисмати ҳақида қўшиқ куйлади. Бу ҳақда «Даракчи» газетаси хабар бермоқда.
Хонанданинг маълум қилишича, у икки йил аввал Сурхондарёга борганида, бир онахон: «Ўтган йили Россияда концерт бергандингиз. Ёдингиздами, ўғлим менга қўнғироқ қилганида, Сиз ҳам менга салом йўллаган эдингиз. Бир йил бўлдики, дараги йўқ. Яна Россияга борсангиз, ўғлимга соғинганимни айтинг», деган.
«Шундан сўнг ўзга юртда юрган ватандошларимиз номидан оналаримизга атаб қўшиқ куйлаш ғояси туғилди», — деди Озодбек Назарбеков, ўз концерт дастурида янги қўшиқни куйлашдан аввал.
«Хонанда ‘Алло, Она’ номли қўшиғини куйлаб, мухлисларнинг кўзини ёшлатди. Экранда кўрсатилган муҳожирларнинг ҳаёти тасвири эса томошабин юрагини ўртагани ҳам шубҳасиз», — деб ёзади «Даракчи» газетаси.
Эслатиб ўтамиз, 10—20 апрель кунлари «Истиқлол» санъат саройида Озодбек Назарбековнинг яккахон концерт дастури бўлиб ўтади. Концертнинг дастлабки кунларидан тайёрланган фоторепортаж билан бу ерда танишиш мумкин.
Изоҳ (0)