Сальвадор расмийлари Панаманинг Mossack Fonseca юридик компанияси офисида рейд ўтказди ва ҳужжатлар ҳамда қурилмаларни мусодара қилди. Бу ҳақда мамлакат бош прокуратураси маълум қилди, дея хабар беради «Ведомости».
Операцияни шахсан кузатган бош прокурор Дуглас Мелендес расмийлар Mossack Fonseca 7 апрель, пайшанба куни офис киришидаги ёрлиқлар олиб ташлаганидан сўнг бундан шубҳаланиб, эртасига мазкур операцияни ўтказишга қарор қилганини билдирди. Компания ходимлари буни офис бошқа жойга кўчирилаётгани билан изоҳлаган. Рейд давомида 20 та компьютер, ҳужжатлар олинган, етти нафар ходим сўроқ қилинган, бироқ ҳеч ким қўлга олинмаган.
«Ҳозир қандайдир жиноятлар ҳақида гапиришга эрта. Амалга ошираётганларимиз одатий ишимиздан иборат», — дея таъкидлаган бош прокурор. Маҳаллий ОАВнинг билдиришича, Сальвадор фуқаролари мамлакатда декларация қилиш заруратисиз мол-мулк сотиб олиш учун компания хизматидан фойдаланган.
Маълумот учун, Mossack Fonseca фаолияти Журналистлик текширувлари халқаро консорциуми (ICIJ) томонидан ўрганилмоқда, бунга консорциум қўлга киритган компаниянинг 11,5 миллионга яқин ҳужжати асос бўлган. Уларда 12 нафар собиқ ва амалдаги давлат етакчилари, Forbes рўйхатидаги 29 нафар миллиардер, шунингдек, кино ва спорт юлдузлари номлари келтирилган.
Изоҳ (0)