Facebook’даги «Водители Ташкента (Drivers.uz)» гуруҳи аъзоси тирбандлик вақтида қоидага хилоф равишда йўлнинг қарама-қарши қатнов қисмига чиқиб кетган автомобиллар акс этган видеоёзувни эълон қилди.
Автомобиль видеорегистратори ёрдамида олинган ҳолат шаҳарнинг Юнусобод туманидаги Мойқўрғон кўчасида 30 март куни тонгда юз берган. Фойдаланувчилар шу каби вазият бу ерда ҳар куни кузатилишини ёзиб, қоидабузар ҳайдовчиларни кескин танқид қилган.
Видеода ўз қатнов қисми бўйлаб келаётган «Волга»нинг олдидан Йўл ҳаракати қоидаларига хилоф равишда, қарама-қарши қатнов қисмига чиққан ҳолда, давлат рақами 01 W 886 JA бўлган Spark бошчилигида автомобиллар «карвони» ҳаракатланиб келганини кўриш мумкин.
«Волга» ҳайдовчиси бу автомобилларга йўл бермаган. Натижада, йўлнинг бўшатилишидан умидини узган ортдаги автомобиллар — давлат рақами 01 H 633 OA бўлган Lacetti, унинг кетидан давлат рақами 01 F 771 EA бўлган Lacetti қарама-қарши қатнов қисмининг 3-бўлагидан 2-бўлагига ўтиб, «Волга»ни айланиб ўтган.
Кейинроқ улар сафига Tico (давлат рақами — 01 U 205 WA) ва Lacetti (01 K 997 WA) қўшилган.
«Карвон»га бошчилик қилган Spark ўз қатнов қисмига суқилиб кирган — унинг ортидан иккита Matiz (бирининг давлат рақами — 01 M 660 EA, иккинчисиники — 01 R 966 TA) ва битта Nexia (давлат рақами — 01 Q 181 FA) эргашиб келган.
Маъмурий жавобгарлик тўғрисидаги кодекснинг 128-5-моддаси («Транспорт воситалари ҳайдовчиларининг халақит бериши ёки авария ҳолатини юзага келтириши, йўлнинг қарама-қарши ҳаракатланиш учун мўлжалланган томонига ёки бўлагига чиқиши») 2-қисмига кўра, транспорт воситалари ҳайдовчиларининг йўлнинг қарама-қарши ҳаракатланиш учун мўлжалланган томонига ёки бўлагига йўл ҳаракати қоидаларини бузган ҳолда чиқиши энг кам иш ҳақининг 10 баравари (7 апрель ҳолатига кўра — 1 302 400 сўм) миқдорида жаримага сабаб бўлади.
Изоҳ (0)