АҚШнинг Tesla Motors компаниясига Model 3 электромобилининг янги моделига рекорд даражада — 276 мингта буюртма келиб тушди. Бу ҳақда «ТАСС» хабар бермоқда.
«2 апрель, шанба куни охирига келиб 276 мингта буюртма олдик. Уларнинг сони 500 минггача етишини тахмин қиляпмиз. Агар талаб шу даражада қолса, уларни қондириш учун Европада иккинчи автойиғиш корхонасини очишга тўғри келади», — дея таъкидлаган компания раҳбари Илон Маск.
Шунингдек, Маск буюртмаларни бажаришда учраётган муддатдан ўтиб кетиш ҳолатларига барҳам беришни ҳам ваъда қилди. Унинг тан олишича, жорий йил биринчи чорагида бундай вазиятлар бўлган ва улар асосан эҳтиёт қисмлар етишмаслиги ҳамда Model X йўлтанламасидаги «ҳаддан зиёд замонавий технологиялар» билан боғлиқ.
Эслатиб ўтамиз, 1 апрель куни Tesla компанияси нархи 35 минг доллардан бошланадиган Model 3 электромобилини тақдим этди.
Изоҳ (0)