Жорий йилда Фарғонада талабаларнинг «Универсиада–2016» мусобақалари финал босқичи бўлиб ўтади. Айни кунларда вилоятда мазкур спорт байрамига қизғин тайёргарлик кўрилмоқда, дея хабар беради ЎзА.
Мусобақалар ўтказиладиган 29 объект, жумладан, Фарғона давлат университети, Фарғона политехника институти, Фарғона олимпия захиралари спорт коллежида тайёргарлик ишлари авжида. Спорт заллари замон талаблари асосида таъмирланиб, жиҳозланмоқда. Фарғона давлат университетида 3 минг 200 ўринли футбол майдони, ёпиқ сузиш ҳавзаси, учта волейбол майдони ва енгил атлетика йўлаклари қурилиб, фойдаланишга топширилди.
Мусобақа иштирокчиларининг яшаши, овқатланиши ва мазмунли дам олиши учун қулай шароитлар яратишга алоҳида эътибор қаратилмоқда. Фарғона давлат университети ва Фарғона политехника институтининг талабалар турар жойи бинолари замонавий таъмирдан чиқарилмоқда.
Вилоят марказида кенг кўламли ободонлаштириш ва кўкаламзорлаштириш ишлари амалга оширилиб, хиёбон ва кўчаларда гулзорлар ташкил этилмоқда. Фарғона, Маърифат, Мураббийлар каби марказий кўчалар замонавий архитектура талаблари асосида таъмирланмоқда, қарийб 5 километрлик йўл реконструкция қилинмоқда.
Изоҳ (0)