Ўзбекистон терма жамоаси Филиппин билан ўйинда муҳим уч очкони қўлга киритди

Бугун, 24 март куни Тошкентдаги «Бунёдкор» стадионида ЖЧ—2018 ва Осиё Кубоги—2019 саралаши доирасида Ўзбекистон термаси Филиппинга қарши баҳс олиб борди. Унда 1:0 ҳисоби қайд этилиб, Ўзбекистон терма жамоаси фойдасига ҳал бўлди.

Биринчи бўлимда Ўзбекистон терма жамоасида ҳисобни очиш учун бир қатор қулай вазиятлар вужудга келди. Аммо уларнинг бирортаси ҳам голга айланмади. Дастлабки бўлимнинг эътиборга молик томони Филиппин термаси ҳужумчиси Хосе Элмер Портерианинг 10-дақиқада четлатилиши бўлди.

Иккинчи бўлимнинг 57-дақиқасида захирадан майдонга тушган Александр Гейнрих ўйинга тезда киришиб кетди. 59-дақиқада Гейнрих жарима зарбасини ишлаб олди ва уни ўзи амалга оширди. Унинг узатмасидан сўнг Анзур Исмоилов боши билан тўпга зарба берди ва тўп Нил Итериж дарвозаси тўридан жой олди. Мазкур ўйинда ягона бўлиб қолди.

Ғалабадан сўнг Ўзбекистон терма жамоаси «H» гуруҳида очколар сонини 18 тага етказиб, гуруҳ пешқадамига айланиб олди. Иккинчи ўринда бораётган Шимолий Корея термаси ҳисобида 16 очко мавжуд. Ушбу гуруҳдаги Баҳрайн ва Яман ўртасидаги учрашув бугун, 24 март куни Тошкент вақти билан 20:30 да бошланади.

Эслатиб ўтамиз, Ўзбекистон термаси Жаҳон чемпионати–2018 турнирига иккинчи саралаш босқичи «H» гуруҳидаги сўнгги учрашувини 29 март, сешанба куни Баҳрайнга қарши ўтказади. Мазкур ўйин Тошкентдаги «Бунёдкор» стадионида, соат 18:00 да бошланади.

Ўзбекистон – Филиппин 1:0 (0:0)

Огоҳлантириш: Мартин Штебл (8)

Четлатиш: Хосе Элмер Портериа (10)

Ўзбекистон: Александр Лобанов, Виталий Денисов, Егор Кримец, Анзур Исмоилов, Ислом Тўхтахўжаев, Сервер Жепаров (Александр Гейнрих, 57), Жавоҳир Соҳибов, Одил Аҳмедов, Сардор Рашидов (Марат Бикмаев, 82), Элдор Шомуродов (Жасур Ҳасанов, 52), Игорь Сергеев.

Филиппин: Нил Итериж, Симоне Рота, Хуан Гирадо, Люк Вудланд, Ян Рэмсей (Майкл Дениэлс, 64), Сато Дайсуке, Амани Агиналдо, Патрик Рейчелт (Деннис Вильянуэва, 70), Хавьер Патино, Мартин Штебл, Хосе Элмер Портериа.

Ҳакамлар: Рюжи Сато (Япония), Тору Сагара (Япония), Шинжи Очи (Япония), Пу Удом Сивакорн (Таиланд).