Баҳорнинг энг асосий байрами — Наврўз билан боғлиқ энг яхши халқ ўйинларидан бири бу — варрак учиришдир. Кунлар илиши билан Ўзбекистон шаҳарларида варраклар савдоси, варраклар парвози авж олади.
Facebook’даги «Водители Ташкента (Drivers.uz)» гуруҳида жуда катта варракларнинг сотилаётган ва учаётган акс этган суратлар эълон қилинди. Суратларнинг бирида Airbus авиаконцернининг энг катта A380 лайнерига қиёсан «Варрак A380» деб таърифланган «ўйинчоқ» бир болакайдан камида уч баробар катталиги очиқ кўриниб турибди.
Бу варракка, шунингдек, «Варраккоптер», «Лайлакцикл», «Ўзбекча дрон», «Учар гилам», «Варрак 737» каби таърифлар берилган, «Бу Boeing’га бизнинг жавобимиз!» каби ҳазиломуз фикрлар билдирилган. Фойдаланувчиларнинг ёзишича, бундай катта варракларнинг нархи 300 минг сўмгача етади.
Бир фойдаланувчининг ёзишича, бундай варракни бир ёки икки киши учира олмайди, бунинг учун бутун жамоа керак, шунингдек, каноп ип ва қўлқоп ҳам зарур. «Агар кучли шамол бўлиб қолса, бундай варракни машина билан ҳам ушлаб қола олмайсиз», — деб ёзади фойдаланувчи.
Изоҳ (0)