Foto: Varrak A380. Juda katta varrak

Bahorning eng asosiy bayrami — Navro‘z bilan bog‘liq eng yaxshi xalq o‘yinlaridan biri bu — varrak uchirishdir. Kunlar ilishi bilan O‘zbekiston shaharlarida varraklar savdosi, varraklar parvozi avj oladi.

Facebook’dagi “Voditeli Tashkenta (Drivers.uz)” guruhida juda katta varraklarning sotilayotgan va uchayotgan aks etgan suratlar e’lon qilindi. Suratlarning birida Airbus aviakonsernining eng katta A380 layneriga qiyosan “Varrak A380” deb ta’riflangan “o‘yinchoq” bir bolakaydan kamida uch barobar kattaligi ochiq ko‘rinib turibdi.

Bu varrakka, shuningdek, “Varrakkopter”, “Laylaktsikl”, “O‘zbekcha dron”, “Uchar gilam”, “Varrak 737” kabi ta’riflar berilgan, “Bu Boeing’ga bizning javobimiz!” kabi hazilomuz fikrlar bildirilgan. Foydalanuvchilarning yozishicha, bunday katta varraklarning narxi 300 ming so‘mgacha yetadi.

Bir foydalanuvchining yozishicha, bunday varrakni bir yoki ikki kishi uchira olmaydi, buning uchun butun jamoa kerak, shuningdek, kanop ip va qo‘lqop ham zarur. “Agar kuchli shamol bo‘lib qolsa, bunday varrakni mashina bilan ham ushlab qola olmaysiz”, — deb yozadi foydalanuvchi.