«Наврўз» нашриёти томонидан жорий йилда «Тошкентнинг табаррук зиёратгоҳлари» деб номланган китоб нашрдан чиқди, деб ёзади «Ўзбектуризм» миллий компанияси матбуот хизмати. Ушбу китоб Тошкентнинг 2200 йиллик юбилейига бағишлаб чиқарилган «Тошкентнома» (2004, 2009) китобининг давоми сифатида яна тўлиқ маълумот билан бойитилган.
Ушбу рисолада ҳозирги Тошкент ҳудудида яшаб, фаолият олиб борган илм-фан, маърифат ва маданият ривожига ҳисса қўшган олимлар, азиз-авлиёларнинг ибратли ҳаёти, уларнинг фикрлари ва ҳикматлари баён қилинган. Рисола муаллифлари бир қатор тарихшунос олимлар, меъморий ёдгорликлар мутахассислари, археолог ва манбашунослар кўмаги билан ҳозиргача сақланиб қолган ёзма манбалар ва оғзаки ривоятлар асосида тўпланган.
Рисола 130 саҳифадан иборат ва 40 нафар азиз-авлиёлар (Қаффол Шоший, Занги Ота, Чўпон ота каби), 6 нафар Тошкент ҳокимлари ва 30 га яқин Тошкентнинг таниқли зиёли ва амалдорлари (Чилонзор ота, Яланғоч Ота каби) ҳақида маълумотни ўз ичига жамлаган.
Китоб сўнгида «Тошкентдаги азиз инсонларнинг пайғамбаримизга қадар бўлган шажаралари» ҳамда «Кўҳна Тошкентнинг даҳа ва дарвозалари харитаси» илова қилинган.
Ушбу китоб Тошкентдаги кўплаб кўча, маҳалла, туман каби жой номлари (топонимлар) келиб чиқиши, зиёратгоҳлар тарихига қизиқувчи китобхон учун зарур манба бўлишидан ташқари, сайёҳлик компаниялари ва гидлар учун чет эллик ва маҳаллий сайёҳларни зиёратгоҳлар билан таништириш экскурсияларида фойдали қўлланма бўлиб хизмат қилиши мумкин.Яқин кунларда китобнинг рус ва инглиз тилидаги таржималари ҳам сотувга чиқарилади.
«Тошкентнинг табаррук зиёратгоҳлари» китобини Тошкент шаҳридаги китоб дўконларидан харид қилиш мумкин.
Изоҳ (0)