Лондон каптарлари интернетга «уланади»

Лондондаги каптарларга интернетга уланиш қурилмалари ҳамда шаҳар ҳавосининг ифлосланганлик даражасини ўлчайдиган датчиклар жойланган рюкзаклар тақилади, дея хабар бермоқда «Hi-tech.mail.ru». Бу Twitter, DigitasLBi ва Plume Labs of Paris компанияларининг қўшма лойиҳаси бўлиб, у «Каптарлар патрули» деб ном олди.

Лойиҳанинг расмий сайтида ҳар бир каптарнинг жойлашган жойини кузатиш мумкин бўлади. Лондон аҳолиси, шунингдек, у ердаги экологик муҳитга қизиққан бошқа шаҳарлар фуқаролари ҳам PigeonPatrol’нинг бета-синовчиларига айланиши мумкин. Ўлчовлар натижаларини ташкилотчилар махсус очилган Twitter-аккаунт — @PigeonAir орқали эълон қилиб боради.

Қушларнинг рюкзакларидаги датчиклар атмосферадаги озон ва азот диоксиди даражасини аниқлаш учун мўлжалланган. Қурилмалар Корнуэль университети муҳандислари томонидан яратилган бўлиб, улар жуда кичик вазнга эга ва парвоз чоғида қувват тўплайди.

Қуш парвоз этаётган вақтда 300 мВт га яқин электр қуввати ишлаб чиқарилади. Бу датчиклар қувватланиши учун ҳам, акселерометр, симсиз ресивер ва хотира модули ишини таъминлаш учун ҳам етарли бўлади.