Nike фирмаси концепцияси «Келажакка қайтиб-2» фильмида тақдим этилган кроссовканинг реал версиясини тақдим этди, деб хабар беради Meduza.
Фильм сюжетига кўра, бош қаҳрамон Марти Макфлай келажакка бориб, боғичи ўз-ўзидан боғланадиган кроссовкага эга бўлади. Nike Hyperadapt 1.0 кроссовкаси айнан мана шундай хусусиятга эга.
Nike Hyperadapt 1.0 устида дизайнер Тинкер Хэтфилд ва компаниянинг катта инноватори Тиффани Бирслар ишлади. Бирснинг сўзларига қараганда, инсон товони махсус сенсорга тегиши билан оёқ кийимининг иплари ўз-ўзидан ҳаракатга келиб, боғланади. Кроссовка чеккасида иккита тугма бўлиб, улар боғланишни заифлаштириш ёки кучайтиришга хизмат қилади.
Криштиану Роналду интернетга жойлаштирган видеороликдан маълум бўлишича, футболчи аллақачон кроссовкани синаб кўришга улгурган.
Nike Hyperadapt 1.0 2016 йилнинг Рождество мавсумида сотувга чиқарилади. Уни фақат Nike+ дастури фойдаланувчилари харид қилиши мумкин бўлади. Кроссовка уч рангда таклиф этилади.
Эслатиб ўтамиз, ўтган йил октябрида Марти Макфлай роли ижрочиси Майкл Жей Фокс Nike компанияси томонидан совға қилинган боғичлари ўзи боғланадиган кроссовкаларнинг илк намунасини синаб кўрган эди.
Изоҳ (0)