Ўзбекистоннинг иккинчи ракеткаси Фаррух Дўстов Франциянинг Кемпер шаҳри мезбонлик қилаётган «Челленжер» туркумидаги теннис турнири яккалик баҳсларининг илк учрашувида ғалабага эришди. Бу ҳақда «Оламспорт» хабар бермоқда.
Соврин жамғармаси 42500 еврони ташкил қилувчи мусобақанинг илк даврасида 29 ёшли ўзбекистонлик теннисчи турнирнинг еттинчи ракеткаси бўлган франциялик Кенни Де Шепперга қарши кортга чиқди. Бир соату 54 дақиқа давом этган беллашувда Дўстов 7:6, 4:6, 6:3 ҳисобида ғалаба қозонди.
Таққослаш учун, Фаррух Дўстов ATP рейтингида 218, Кенни Де Шеппер эса 142-ўринни эгаллаб турибди.
Мусобақанинг иккинчи даврасида ўзбекистонлик теннисчи Игорь Сийслингга қарши кортга чиқади.
Эслатиб ўтамиз, мусобақанинг жуфтликлар баҳсида италиялик Андреа Арнабольди билан тандем ҳосил қилган Дўстов биринчи даврада мезбон теннисчилар Дэвид Гуэз ҳамда Максим Тейшерага 5:7, 0:6 ҳисобида ютқазиб қўйганди.