Сухандон Раҳматилла Мирзаев фожиали тарзда оламдан ўтганига бир йил тўлди. Шу муносабат билан Ўзбекистонда хизмат кўрсатган маданият ходими Муслимбек Йўлдошев ҳамкасби билан боғлиқ хотираларини ёдга олди. Унинг хотиралари «Diktor.uz» сайтида эълон қилинди.
Ушбу хотираларда, жумладан, марҳум сухандоннинг ҳаёт йўли, телевидениега кириб келиши ёдга олинади.
«Раҳматилла Мирзаев Тошкентнинг ‘Қашқар’ маҳалласида туғилган. Ўрта мактабдан сўнг бугунги Тошкент маданият ва санъат институтининг актёрлик бўлимига кириб ўқиган. 1976 йили у телевидениеда ўтказилган дикторлар танловида иштирок этиб, юзлаб номзодлар ичида ғолиблар қаторида ишга қабул қилинган. Раҳматилла Мирзаев жуда тез элга танила бошлади. Айниқса унинг икки тилда эркин ишлай олиши ўша даврнинг асосий талабларидан эдики, у сухандонга кенг имкониятлар эшигини очарди».
Муслимбек Йўлдошев Раҳматилла Мирзаевнинг овоз тембри фавқулодда ёқимли бўлганини эътироф этади.
«‘Ахборот’да ҳам, қатор бошқа кўрсатувларда ҳам эшитувчиларга маъқул бўладиган, ‘микрофонбоп’ эди. У овоз берган ҳужжатли кино-видео фильмлар жуда кўримли бўларди. Назаримда, унинг ўзи ҳам, теле-радио режиссёрлар ҳам бу имкониятдан тўла фойдаланишмади. Гарчи, юзлаб фильмларда унинг овози муҳрланган бўлса-да, бу, менинг назаримда, жуда кам. Ахир, биргина радионинг ўзида қанча ижод намуналарини ‘олтин фонд’га ёздириб ташлаш мумкин эди!
У жуда киришимли эди. Латифагўй, қизиқ-қизиқ воқеаларга ўч, кулгуни, ҳазилни яхши кўрарди. Ҳозиржавоб эди. Хушчақчақ пайтларида унга етадиган ҳамсуҳбат йўқ эди. Ҳайқириб, яйраб куларди. У очиқ одам эди. Агар кимдандир норози бўлса, ўша одам ҳақида жўяли бирор гапи бўлса, ўзига очиқ айтарди. Дангалчи эди, деса ҳам бўлади. Мен уни таниган пайтимда ёнида бўлган дўстлари билан сўнгги пайтларгача ҳам алоқалари яхши эди. Улар қайси соҳа эгаси бўлишидан қатъий назар, борди-келдилари узилмаган эди. Табиийки, бу ҳам яхши фазилатлардан бўлиб, у одамнинг феъл-атвори ўзгармас, субутлилигидан хабар беради».
Марҳум сухандон маълум вақт телевидениеда кўринмай қолди. Бунинг сабабларини Муслимбек Йўлдошев шундай изоҳлайди:
«Қизиққонлиги ўзига панд бериб қолди. Кимларнингдир айби учун, бировлар ўз зиммасидаги ишини вақтида бажариб қўймагани учун, Раҳматилла Мирзаев жавоб беришига тўғри келди. Эфирдаги кичиккина — биров билиб, биров билмай қолган ҳаракати учун уч йил яхши кўрган ишидан четлатиб қўйилди. Аслида бирламчи хато учун у жавобгар эмасди. Бироқ, эфир буни тушунмади».
Раҳматилла Мирзаев фожиали ўлим топганидан сўнг унинг оиласи билан боғлиқ турли овозалар тарқалди. Бу ҳақда Муслимбек Йўлдошев шундай дейди:
«Мен уни қанчалик билсам, оилапарвар деб билардим. Чунки, топгани оиласига, қизи ва ўғлига аталган эди. Энг аввал, замонавий, янги квартирага кўчиб ўтишди. Кейин уни катта таъмирдан чиқарди. Машиналик бўлишди. Ва ниҳоят, данғиллатиб уй ҳам қуришди.
Нимадир ўхшамаган, қайсидир мўлжал тўғри олинмаган экан шекилли, кейинги ҳаётларида бир қанча ўзгаришлар юз берди. Биз, оддий одамлар, кези келганда нафақат ҳамкасбларимизнинг, балки туғишган жигарларимизнинг ҳам оиласидан нималар ўтаётганини билолмаймиз. Эшитганимизда эса, кеч бўлган бўлади. Ҳар қалай, Раҳматилла Мирзаев на менга ва на дикторлар гуруҳидаги бошқа бировга оиласидан шикоят қилганини эшитмаганман, гувоҳ бўлмаганман.
Бугун роса бир йил бўлибдики, Раҳматилла Мирзаев орамизда йўқ. Аммо бу дегани ўрни ҳам йўқ дегани эмас. Дўстлари, яқинлари, ҳамкасблари ва шогирдлари қалбида унинг ўчмас ўрни бор. Ўшалар бор экан, Раҳматилла Мирзаев ҳам сафда бор».
Эслатиб ўтамиз, 2015 йилнинг 2 март куни Раҳматилла Мирзаев ўлдириб кетилгани ҳақида хабарлар тарқалди. Мазкур жиноят иши бўйича Қ. Шоазизов ва У. Мирзаевга нисбатан айблов эълон қилинди.
Изоҳ (0)