«Ўзбекнаво» эстрада бирлашмаси Махсус рухсатнома (лицензия) берувчи ташкилий бошқармаси бошлиғи Одилжон Абдуқаҳҳоровнинг «Дарё» мухбирига маълум қилишича, Тамила тахаллуси остида ижод қилиб келган Эсмеральда Раҳматованинг яна лицензия олиши «жуда қийин масала».
«Тамиланинг лицензияси кун келиб қайтарилиши мумкинми-йўқми, бу ҳақда бир нима дея олмайман. Жуда қийин масала, буни вақт кўрсатади. Агар шу тарбияда бўлса, Тамиланинг лицензияси умуман қайтарилмайди», — деди «Ўзбекнаво» бошқарма бошлиғи.
Тамила яна қўшиқ айтишни хоҳласа, хулқ-атвори яхши томонга ўзгарганини қандай исботлаши мумкинлиги ҳақидаги саволга, Одилжон Абдуқаҳҳоров шундай жавоб берди: «Билмадим, бу ҳақда ҳали ўйлаб ҳам кўрилмади».
«Ўзбекнаво» эстрада бирлашмаси 2016 йил 1 февралдан Тамиланинг лицензиясини тугатди. Бунга «лицензия битимида назарда тутилган талаб ва шартлар мунтазам равишда бузилганлиги» сабаб қилиб кўрсатилган.
Аввалроқ, Тамила иштирокидаги ахлоқсиз видеоёзув мессенжерларда тарқалиб кетган, шундан сўнг хонанда Қозоғистонга кўчиб ўтгани ҳақида хабар берилганди.
Қайд этиш жоиз, Тамила 2015 йил июль ойида лицензиясидан маҳрум этилган, бироқ шу йилнинг ноябрь ойида янги лицензия олганди. Унинг бу лицензияси амал қилиш муддати 2016 йилнинг августида якунига етар эди.
Изоҳ (0)