Станиславский ва Немирович-Данченко номидаги Москва академик мусиқий театри солисти Нажмиддин Мавлонов 11 январь куни Лондоннинг «Ковент-Гарден» Қироллик театрида Пуччинининг «Тоска» операсида Каварадосси партияси билан биринчи марта чиқиш қилди. Бу ҳақда солистнинг «ВKонтакте» ижтимоий тармоғидаги саҳифасида айтилади.
Мавлонов ушбу ролида мазкур театр саҳнасида 25, 29 январь ҳамда 2 февраль кунлари ҳам чиқиш қилди. Опера 5 февраль куни ҳам тақдим этилади.
Хонанда Насиба Абдуллаева Facebook’даги саҳифасида операдан кейин Нажмиддин Мавлонов билан тушган суратларини эълон қилди ва унинг ижросига тасанно айтиб, у билан фахрланишини таъкидлади.
Нажмиддин Мавлонов 2008 йилда Тошкент давлат консерваториясини битирган. 2003—2010 йилларда Алишер Навоий номидаги Тошкент давлат опера ва балет академик театри солисти бўлиб ишлаган. Станиславский ва Немирович-Данченко номидаги Москва академик мусиқий театрига 2010 йилда ишга ўтган. Кўпгина халқаро танловлар ғолиби.
Изоҳ (0)