Ойбек ва Нигора маънавият дарсларига келмаганлиги учун «Ўзбекнаво» томонидан огоҳлантирилгани маълум бўлди

«Ўзбекнаво» эстрада бирлашмаси хонандалар Жасур Умиров, Ойбек ва Нигора ҳамда Умидахонни нима сабабдан огоҳлантиргани маълум бўлди. Бу ҳақда бирлашманинг Махсус рухсатнома (лицензия) берувчи ташкилий бошқармаси бошлиғи Одилжон Абдуқаҳҳоров «Дарё» мухбирига маълум қилди.

«Жасур Умиров, Ойбек ва Нигора, Умидахон ва бошқа хонандаларга огоҳлантиришлар санъаткорлар учун ўтказилган маънавият дарсларига келмаганлиги сабабидан берилган», — дейди Одилжон Абдуқаҳҳоров.

«Бир нарсани алоҳида такидлаб ўтишим керак — бу санъаткорлар тадбирларда мунтазам қатнашган, тарбияси, ахлоқи ҳам яхши, аммо маънавият дарсларига келмагани учун огоҳлантирилди», — деди «Ўзбекнаво» вакили.

Аввалроқ, хонанда Дилфуза Исмоилованинг «Ўзбекнаво» томонидан огоҳлантирилишига унинг «сариқ кийимдаги расмлари» тарқалиб кетгани ҳам сабаб бўлгани маълум қилинган эди.

Эслатиб ўтамиз, 2 февраль куни «Ўзбекнаво» эстрада бирлашмаси хонанда Тамила (ва Замир)нинг лицензияси тугатилгани, хонанда Жасур Умиров, Дилфуза Исмоилова, Абдували Ражабов, Ойбек (Алимов), Нигора (Исмоилова) ва Умида Ходжаева огоҳлантирилганини билдирган эди.