Ҳиндистон жанубидаги Андхра-Прадеш штатида намойишчилар битта поезд ва 25 та автомобилни ёқиб юборди. Бу ҳақда The Times of India нашри берган маълумотларга асосан «РИА Новости» хабар қилмоқда.
Капу табақасига тегишли бўлган намойишчилар ўзларини давлат ишларига жойлашишда ва ўқув даргоҳларига киришда алоҳида имтиёз ва ҳуқуқ берилган табақалар тоифасига киритишни талаб қилмоқда.
Минглаб намойишчилар Вижайявада ва Вишакхапатнам шаҳарларини боғловчи темир йўлни тўсиб қўйиши оқибатида темир йўл қатнови тўхтатилди. Бундан ташқари, фаоллар юқори тезликдаги Ченнай—Калькутта шоссесини ҳам беркитган.
Штат бош вазири Чандрабабу Найду фавқулодда мажлис йиғишга ва тартибни сақлаш мақсадида ҳудудга қўшимча куч юборишга қарор қилди.
Ҳар хил жамоаларнинг табақадан келиб чиқиб имтиёз талаб қилиш ҳоллари Ҳиндистонда тез-тез учраб туради. 2015 йилнинг августида Гужорот штатида пател табақаси вакиллари келтириб чиқарган ғалаёнларда тўққиз киши ҳалок бўлган эди.
Изоҳ (0)