Британиялик талаба Nestle’дан умрбод шоколад билан таъминлашни талаб қилди

Британиялик талаба қиз Саима Аҳмад Nestle компанияси ишлаб чиқарган KitKat батонларидан саккизта ўрамини харид қилиб, уларнинг ҳеч биридан вафли топа олмагач, компаниядан умрбод шоколад билан таъминлашни талаб қилди. Бу ҳақда The Daily Mail хабар беради.

Лондоннинг Kings коллежи ҳуқуқшунослик факультетининг иккинчи курс талабаси 20 ёшли Саиманинг сўзларига қараганда, у яроқсиз шоколад батончасини 2015 йилнинг декабрь ойида икки фунт стерлингга (2,8 доллар атрофида) харид қилган. «Улар (Nestle) KitKat’нинг ноёб таркибини реклама қилади, лекин мен сотиб олган нарсадан жуда таъбим хира бўлди», — дейди қиз.

Саиманинг таъкидлашича, фақат KitKat’да «вафли ва шоколаднинг ўзига хос бирикмаси» реклама қилинади ва у айнан шунақасини ёқтирган.

Талаба Nestle’га йўллаган мактубида компания ундан узр сўрашига ва бундан кейин «маҳсулотининг сифатига кўпроқ эътибор беришига» умид қилган. У Nestle’га бўлган ишончини йўқотганлиги ҳамда унга моддий ва маънавий зарар етганлигини таъкидлаган.

Саима, шунингдек, компаниядан сифатини назорат қилиб туриш учун унга KitKat шоколадларини умрбод текин етказиб туришни талаб қилган. Талаба компания унинг талабларини бажармаган тақдирда, «юридик чоралар» кўриш билан таҳдид қилган.