Ўзбекистонлик ҳайдовчилар орасида 2015 йилда автомобилнинг орқа стоп-сигналларини тинмасдан липиллаб, чақнаб турадиган қилиш жуда оммалашди. Оммалашдими, демак, бундай тюнингга талаб, хоҳиш бор. Шу билан бирга, ижтимоий тармоқларда фаол ҳайдовчиларнинг аксарияти бу ҳолатга салбий муносабат билдирди.
Ўрни келганда таъкидлаш жоиз, липиллаган чироқлар шу қадар оммалашдики, уларни йўналиш бўйлаб ҳаракатланаётган катта Mercedes автобусларида ҳам, милиция ходимларининг Lacetti’ларида ҳам учратиш мумкин. Afisha нашри 2015 йил ноябрида ушбу масалада алоҳида материал ҳам тайёрлаб, Дилшод ака исмли йўл ҳаракати хавфсизлиги хизмати ходимидан интервью ҳам олганди.
«Нега липиллайдиган чироқларни ўрнатишяпти? Чунки баъзи бировларнинг қиладиган бошқа иши йўқ! Олд томонга ҳам, орқа томонга ҳам бирор-бир липиллайдиган чироқларни ўрнатиш мумкин эмас. Автоҳаваскорлар эса ўз машинаси бошқаларникидан ажралиб туриши учун ҳар турли техник янгиликлар билан уни безашга уринади, бироқ мен бунда ҳеч қандай яхши нарсани кўрмаяпман», — деганди йўл назоратчиси.
Интернет-нашр савол билан мурожаат қилган ҳайдовчилардан бири эса, ўз автомобилига бундай чироқларни ўрнатишни истамаса-да, бироқ ўзига шуни раво кўрганларни танқид қилиш нотўғри эканлиги, ҳар кимда танлов ҳуқуқи борлигини эслатиб ўтган.
«Шундай чироқларни ўрнатганларни танқид қилишга уринаётганлар — шу каби янгиликка пул сарфлашни хоҳламайдиган кишилардир. Биз рақибларимизнинг устунликларини камчилик сифатида баҳолаб, уларни танқид қилишга, ўз навбатида, ўзимиздаги камчиликларга эътибор қаратмасликка ўрганиб қолганмиз», — деганди ўшанда ҳайдовчи Дилёра Бекбоева.
Интернетдаги оммабоп саҳифаларда, Facebook ижтимоий тармоғининг «Водители Ташкента», «Водители Ташкента (Drivers.uz)» саҳифаларида ўз автомобилига липиллайдиган чироқларни ўрнатганларни танқид қилувчилар жуда кўплаб топилади.
Қаршисидан орқа стоп-сигналлари липиллайдиган автомобиль чиққанида, уни авторегистраторига ёзиб олиб, сўнг видеони оммага эълон қилар чоғида, бирорта салбий фикрни илова қилиш одат тусига кирди. Аксарият фойдаланувчилар видеолардаги автомобиль эгаларини кескин, баъзи ўринларда ҳақоратлар билан танқид қилган. «Ҳайдовчиларнинг 90 фоизи бундай чироқларга қарши бўлса керак», — деб ёзади фойдаланувчилардан бири. «Арча байрам!» — липиллайдиган чироқ танқидчилари томонидан қолдириладиган одатий комментлардан.
Баъзи фойдаланувчиларнинг фикрича, бу каби видеоларни Facebook’га жойлаштириб, ҳайдовчиларни обрўсизлантириш билан, липиллайдиган стоп-сигналларнинг оммалашувини тўхтатиб ёки тугатиб бўлмайди. «Ҳамма нарса инсоннинг ўзига боғлиқ, бу каби майда-чуйда нарсаларга эътибор бермай ҳам юрса бўлади», — дейди бир фойдаланувчи. Бошқа бир фойдаланувчи эса чироқларнинг бундай липиллаши «баъзи лақмалар»ни ҳушёрликка чақиради ва йўл-транспорт ҳодисалари олдини олади.
Маълумот учун, Ўзбекистон Маъмурий жавобгарлик тўғрисидаги кодекси 127-моддаси («Транспорт воситаларининг товуш чиқарувчи ва ёритувчи қурилмаларидан фойдаланиш қоидаларини бузиш») 1-қисмига кўра, транспорт воситаларининг ёритувчи қурилмаларини ўзгартириб ўрнатиш — энг кам иш ҳақининг бир баравари (21 январь ҳолатига кўра — 130 240 сўм) миқдорида жарима солинишига сабаб бўлади.
Изоҳ (0)