Меҳнат ва аҳолини ижтимоий муҳофаза қилиш вазирлиги қошидаги Ташқи меҳнат миграцияси агентлиги томонидан 2015 йилда Ўзбекистон ҳудудига хорижий ишчи кучини жалб этиш учун юридик шахсларга 1,5 мингта рухсатнома берилди ва Ўзбекистон ҳудудида меҳнат фаолиятини юритишга оид 4,8 мингта ариза тасдиқланди. Бу ҳақда Меҳнат ва аҳолини ижтимоий муҳофаза қилиш вазири Азиз Абдуҳакимов ОАВга берган махсус интервьюсида маълум қилди.
Ўзбекистон фуқароларининг Корея ва Япония билан келишув асосида хорижда меҳнат қилишларини қўллаб-қувватлаш йўлида ҳам фаол иш олиб борилди. Агентлик Ўзбекистон Республикаси Ташқи ишлар вазирлиги билан ҳамкорликда дунёнинг бошқа ривожланган давлатлари билан ҳам меҳнат миграцияси бўйича ҳамкорликни йўлга қўйиш масалаларини ишлаб чиқмоқда.
Аҳолини ижтимоий ҳимоя қилиш соҳасида ҳам бир қатор натижаларга эришилди. 2015 йилда ушбу соҳада амалга оширилган энг муҳим ишлардан бири Вазирлар Маҳкамаси томонидан «Ёлғиз кексалар, пенсионерлар ва ногиронларни қўллаб-қувватлаш ва манзилли ижтимоий ҳимоялашни янада кучайтириш бўйича» фармоннинг қабул қилингани бўлди. Мазкур ҳужжатга кўра, ёлғиз кексаларга уларнинг уйида ижтимоий хизмат кўрсатиш ва уларга бепул тарқатиладиган шахсий гигиена ҳамда озиқ-овқат маҳсулотлари тизими такомиллаштирилди. Вазирликнинг бутун диққат-эътибори «Саховат» ва «Мурувват» уйлари моддий-техник базасини бойитиш ишларига қаратилди. Вазирлик қошидаги фахрийлар саломатлигини тиклашга йўналтирилган санаторийлар ҳам эътибордан четда қолмади.
2015 йилда вазирликда кўптармоқли чақирув маркази (call centre) ташкил этилди ва 200-06-00 рақамларида иш бошлади. Марказ узлуксиз фаолият олиб боради ва республиканинг ҳар бир фуқароси қўнғироқ қилиб, меҳнат ва бандлик масалалари бўйича ўзини қийнаётган муаммо юзасидан маслаҳат ва ахборот олиши мумкин.
Ҳозирги кунда барча вилоятлар бўйича бўш иш ўринларини расмий сайтдан билиб олиш мумкин. Интерактив хизматлар ҳам жорий қилинган.
Изоҳ (0)