«Бизнес лабораторияси» лойиҳаси жаҳон тажрибасидан ўтган машҳур ғояларни тақдим этади
Тошкентда бизнес алоқаларнинг тубдан янгича даражасини ташкил этишга қаратилган «Бизнес лабораторияси» ахборот лойиҳасининг тақдимоти бўлиб ўтди. Бу ҳақда лойиҳа ташкилотчилари «Дарё»га маълум қилди.
«Бизнес лабораторияси» лойиҳасини ташкил этиш ташаббуси Ўзбекистоннинг ҳар бири ўз соҳасида етакчи ҳисобланган уч йирик компанияси — Unique Present Media Holding, Халқаро бизнес ва технологиялар ассоциацияси (ХБТА) ва Afisha Media томонидан ишлаб чиқилиб, ҳаётга татбиқ этилмоқда.
Лойиҳанинг асосий мақсади — маҳаллий тадбиркорлар ютуқлари, сифатли медиаконтент ишланмалари, инновацион бизнес-ғоялар ҳақида хабарлар ҳамда бизнесни ташкил этиш ва уни ривожлантириш масалалари билан қизиқувчи аудиторияни шакллантириш орқали Ўзбекистон бизнес-ҳамжамиятларини тараққий эттиришдир.
Мазкур лойиҳа доирасида бизнес-турларни уюштириш, бизнеснинг турли соҳаларида тажриба алмашинувини йўлга қўйиш ва маҳаллий тадбиркорлар иштирокида уларнинг муваффақият тарихини ёритувчи кўрсатувларни суратга олиш кўзда тутилган. Бундан ташқари, хориж мамлакатлари ҳамда Ўзбекистон бўйлаб бизнес-саёҳатларни йилига 2—3 марта ташкил этиш ва келгусида уларнинг видеорепортажлари чиқарилиши режалаштирилмоқда.
Ойига 1—2 марта экспертлар иштирокида тайёрланган махсус кўрсатувлар туркумини эфирга узатиш кўзда тутилган. Ҳар бири 20—25 дақиқа давом этадиган ушбу кўрсатувлар жаҳоннинг етакчи компаниялари тажрибасидан қизиқарли амалий кейсларни намойиш этади.
«Ўзбекистонлик тадбиркорлар иштирокидаги бизнес-турлар у ёки бу мамлакатдаги бизнес жараёнларнинг ташкил этилиши тажрибаси ҳамда унинг маданий ва ижтимоий ҳаёти билан танишишга бағишланган янги медиа маҳсулотининг пайдо бўлиши учун асос бўлиб хизмат қилади. Сафарлар чоғида тўпланган видеоконтент ҳам амалий аҳамиятга молик, ҳам кўнгилочар, умумий ўрганишга доир ахборотдан ташкил топади. Фикримизча, ушбу лойиҳа ёш ҳамда бу соҳада муваффақиятли фаолият юритаётган ишбилармонлар орасида катта қизиқиш уйғотади», — дея қайд этди Afisha Media раҳбари Сурен Сапов.
«Янги ва, фикримизча, истиқболли медиа йўналиш ибтидосида турганимиздан ҳамда энг сара бизнес ғояларни жамлаш ва улар билан маҳаллий тадбиркорларни таништириш имкониятидан фойдалана олаётганимиздан ҳурсандмиз. Лойиҳамизнинг ҳар бир ижодкори нафақат фойдали ва қизиқарли, балки ҳаммабоп сифатли медиа маҳсулотни тайёрлаш учун ўз саъй-ҳаракатларини аямайди», — деди Unique Present Media Holding асосчиси Арсен Длянчев.
«Лойиҳанинг ноёблиги шундаки, унинг асосчилари ва иштирокчилари Ўзбекистонда яшаб, фаолият юритади, турли соҳаларда катта ишбилармонлик ва бошқарув тажрибасига эга. Сафарлар давомида улар турли компаниялар вакилларига саволлар билан мурожаат қилиш, аудитория билан ўз таасуротлари ва тайёр бизнес андозалар билан ўртоқлашиш имкониятига эга бўлади», — деб таъкидлади ХБТА раиси Ҳикмат Абдураҳмонов.
Лойиҳа доирасида дунёдаги етакчи мамлакатларнинг таниқли компанияларига ташриф буюришдан кўзланган асосий мақсад — бу мамлакатда янги ёхуд мавжуд бўлган бизнес лойиҳаларнинг ривожланиши ёки уларнинг мослашувига туртки бўлиб хизмат қилувчи инновациялар ва ноёб бизнес тажриба ҳақида ўзбекистонлик тадбиркорларга тушунарли тилда маълумот етказишдир.
«Бизнес лабораторияси» лойиҳаси доирасида маҳаллий тадбиркорлар иштирокидаги биринчи бизнес-тур, Буюк Британия элчихонаси кўмагида, 2016 йилнинг 22 январь — 2 февраль кунлари Буюк Британияга уюштирилади. Сафар давомида ишбилармонлар гуруҳи BBC WorldWide Lab ва жаҳонга машҳур BHS компаниясининг штаб-квартирасига ташриф буюради, Ўзбекистон элчихонасида ташкил этиладиган учрашувда қатнашади.
Бўлажак бизнес-тур давомида British Expertise иштирокида UK Export Institute билан учрашув, Буюк Британия бизнеси билан b2b-учрашув, Буюк Британияда ўзбек бизнеси вакиллари билан музокаралар, Лондон Фонд биржаси (London Stock Exchange) ва Эдинбургдаги Сент-Эндрюс университетига ташрифлар режалаштирилган.
