Ўзбекистон телевидениесининг таниқли сухандони Галина Мельникова оламдан ўтгани 1 январда маълум бўлган сухандон, Ўзбекистон халқ артисти Абдумўмин Ўтбосаровнинг сўнгги иш куни тафсилотлари билан ўртоқлашди. Бу ҳақда «Бекажон» газетаси хабар бермоқда.
«Мен Абдумўминнинг ўлимидан худди ўз ўғлини йўқотган она сингари изтиробдаман. 31 декабрда телевидениега ёзувга боришимиз керак эди. Келишганимиздек, у машинасида мени ҳам олиб кетди. Йўл-йўлакай одатдагидек суҳбатлашиб кетдик. Студияда унинг нафас олиши қийинлашаётганини кўриб, ҳайрон бўлиб сўраганимда: ‘Ҳаво етишмаяпти’, — деб жавоб қайтарди», — дейди Галина Мельникова.
«Уни дарҳол йўлакдаги диванга олиб чиқдик. ‘Қаеринг оғрияпти?’, — деб сўрасам, юрагини кўрсатди. Ҳамкасбларимиз ҳамширани чақиришди, шундан сўнг мен ўз матнимни ёздириш учун студияга кириб кетдим. Чиққанимда эса, чақирилган ‘Тез ёрдам’ машинаси уни касалхонага олиб кетгани ҳақидаги хабарни эшитдим. Кўнглим ғаш бўлиб, касалхонанинг телефон рақамини топиб, қўнғироқ қилдим», — деди таниқли сухандон.
«Бормоқчи эканлигимни айтганимда, шифокор Абдумўминга инфаркт ташхиси қўйилгани, жонлантириш бўлимида эканлигини айтиб, кириш мумкин эмаслигини таъкидлади. ‘Тузалиб кетишига умид борми?’, — деган саволимга шифокордан: ‘Элликка эллик’, — деган жавобни олдим», — деди Галина Мельникова.
Сухандоннинг сўзларига кўра, шундан сўнг у дарҳол Абдумўмин Ўтбосаровнинг саҳнадоши ва шогирди Дилдора Рустамовага қўнғироқ қилиб, у билан эртаси куни эрталабдан касалхонага боришни режалаштириб қўйган, бироқ 1 январь куни тонгда Абдумўмин Ўтбосаровнинг вафот этгани ҳақида хабар тарқалган.
«Абдумўминни ниҳоятда ўқимишли, зиёли, том маънода ҳақиқий инсон, ишчан ходим сифатида ҳурмат қилардим. Тақдирида эрта кетиш ёзилган экан. Аммо у эркак киши бу дунёга келиб, бажариши керак бўлган ишларни қилиб улгурди: уй қурди, икки фарзандини ўстириб, вояга етказди ва дала ҳовлисида чиройли боғ яратиб кетди», — дея қўшимча қилди таниқли сухандон Галина Мельникова.
Эслатиб ўтамиз, Абдумўмин Ўтбосаровнинг ҳаётдан кўз юмгани 2016 йил 1 январда маълум бўлди. Унинг ўлимига юрак хуружи сабаб бўлган.
Изоҳ (0)