Тошкент шаҳридаги чорраҳаларга ўрнатилган йўл ҳаракати қоидабузарликларини аниқлаш бўйича видеофиксация камералари синов тартибида ишламоқда. Бу ҳақда Ўзбекистон Ички ишлар вазирлиги Йўл ҳаракати хавфсизлиги бош бошқармаси матбуот хизмати раҳбари муовини Мансур Риҳсиев «Дарё» нашрига маълум қилди.
Мансур Риҳсиевнинг сўзларига кўра, сўнгги бир неча йил давомида Тошкент шаҳридаги серқатнов чорраҳаларга биринчи навбатда ўрнатилган фото ва видеофиксация камералари айни вақтда синов тартибида ишламоқда.
ЙҲХББ вакилининг қайд этишича, қоидабузарликка йўл қўйгани фото- ва видеофиксация ускуналари ёрдамида аниқланган ҳайдовчиларга нисбатан жарималар қўллаш механизми ишлаб чиқилган бўлиб, ҳозирда механизмнинг дастурий таъминоти янада такомиллашитирилмоқда.
«Фото- ва видеофиксация воситалари орқали аниқланган қоидабузарликларга нисбатан жарималар қўллаш амалиёти тўлиқ тартибда ишга тушишидан 10 кун аввал бу ҳақда ОАВ орқали жамоатчиликка ахборот берилади», — деди Мансур Риҳсиев.
Маълумот учун, 2016 йил 1 мартдан эътиборан Ўзбекистонда Йўл ҳаракати қоидаларининг янги таҳрири кучга киради. Қоидаларнинг янги таҳрири «Фото- ва видеофиксация» ахборот-ишора белгиси билан тўлдирилгани ҳақида аввалроқ хабар берилган эди.
Изоҳ (0)