Халқаро футбол федерацияси (ФИФА)нинг 209 та миллий уюшмасига кўрсатиладиган 250 минг доллар миқдоридаги бир йиллик молиявий ёрдам 1 миллиард долларгача оширилиши мумкин. Бу ҳақда ФИФА президенти лавозимига номзодини қўйган Иордания шаҳзодаси Али бин Ал-Ҳусайннинг сайловолди дастурида келтирилган маълумотларга таяниб «ТАСС» хабар қилмоқда.
Шаҳзоданинг маълум қилишича, халқаро футбол уюшмалари ФИФАнинг ҳақиқий кучи ҳисобланади.
ФИФАнинг янги президенти сайловлари 2016 йил 26 февралда бўлиб ўтади.
Шаҳзода Алидан ташқари, президентлик лавозими учун ФИФА бош котибининг собиқ ўринбосари, француз Жером Шампан, Нелсон Манделланинг сафдоши, ЖАР уй-жой қурилиш собиқ вазири Токио Сексвале, Осиё футбол конфедерацияси президенти шайх Салмон бин Иброҳим ал-Халифа ва Европа футбол ассоциациялари иттифоқи (УЕФА) бош котиби Жанни Инфантино курашади.
Эслатиб ўтамиз, номзодлардан бири, шайх Салмон бин Иброҳим ал-Халифа мазкур лавозимга сайланган тақдирда маошидан воз кечишини маълум қилган.
Изоҳ (0)