2020 йилда Токиода бўлиб ўтадиган ёзги Олимпиада ўйинлари яқин беш йил мобайнида мамлакат иқтисодиётига қўшимча 30 триллион иен (249 миллиард доллар) келтиради. Бу ҳақда Bloomberg манбаларига таяниб, «Интерфакс» хабар берди.
Япония банки маълумотларига кўра, инфраструктура қурилишига инвестициялар ва сайёҳлар оқими 2014—2020 йилларда Япония ялпи ички маҳсулотига 0,2—0,3 фоиз қўшимча беради, 2017—2018 йилларда эса бу кўрсаткич 0, 6 фоизни ташкил этиши мумкин.
NHK корпорацияси тахминича, Олимпия ўйинлари Японияга дастлабки ҳисоб-китоблардан 6 баробар кўп — салкам 15 миллиард долларга тушади. Таққослаш учун, 2016 йилда ўтадиган Рио-де-Жанейродаги ўйинларга 3,5 миллиард доллардан ошиқроқ маблағ сарфланмоқда. Лондонда 2012 йили ўтказилган Олимпиадага эса 13 миллиард доллар харажат этилган.
Олдинроқ Япония уч бор Олимпия ўйинларини қабул қилган: 1964 йилда Токио ёзги, 1972 йилда Саппоро, 1998 йилда эса Нагано қишки Олимпиадага мезбон бўлган.
Изоҳ (0)