Қозоғистон, Қирғизистон ва Ўзбекистон Республикалари Ташқи ишлар вазирлари, Тожикистон ва Туркманистон Республикалари Ташқи ишлар вазирлари ўринбосарлари ҳамда Европа Иттифоқининг Олий вакили ва Европа Комиссияси вице-президенти 21 декабрь куни Қозоғистон Республикаси пойтахти Остонада «ЕИ – Марказий Осиё вазирлар даражасидаги 2015 йилги учрашуви»ни ўтказди. Бу ҳақда Европа Иттифоқининг Ўзбекистондаги Делегацияси Сиёсат, матбуот ва ахборот бўлими «Дарё»га хабар берди.
Учрашув қатнашчилари бир қанча ўзаро муштарак масалалалар, жумладан ЕИ билан Марказий Осиё ўртасидаги алоқаларни ривожлантириш, барча томонлар учун бирдек муҳим бўлган минтақавий ва халқаро масалалар ҳамда умумий хатарлар ва муаммоларга қарши курашиш масалаларини муҳокама этди. Хавфсизлик борасидаги муҳокамалар Хавфсизлик бўйича юқори даражадаги мулоқот доирасида икки томонлама ҳолда давом эттирилади.
Иштирокчилар ЕИнинг Марказий Осиё Стратегиясининг яқинда бўлиб ўтган таҳлилини муҳокама этди. Ташқи ишлар вазирлари Европа Иттифоқининг Марказий Осиё мамлакатлари билан ҳамкорликни ривожлантиришда содиқ қолиши ва 2014—2020 йиллар давомида Марказий Осиёда амалга ошириладиган дастурларни молиялаш 1 миллиард евродан оширилганини олқишлади. Учрашув иштирокчилари ЕИнинг минтақага ҳар томонлама ёндашуви муҳим эканини эътироф этди. Мазкур ёндашув нафақат кўп томонлама молиявий кўмаклар, балки ЕИга аъзо давлатлар томонидан алоҳида бериладиган кўмаклар ва Европа молиявий ташкилотлари билан яқиндан ҳамкорлик қилишни ўз ичига олади.
Иштирокчилар Европа Иттифоқи билан Марказий Осиё давлатлари ўртасидаги савдо ва сармоявий алоқаларнинг мустаҳкамланиб бораётганини олқишлади ҳамда ўзаро манфаатли иқтисодий ҳамкорликни янада ривожлантириш эҳтиёжи мавжудлигини эътироф этди. Улар Марказий Осиёнинг янада барқарор иқтисодий ривожланишини таъминлаш учун минтақада жозибали сармоя муҳитини яратиш ва бунда қонунларнинг шаффофлигини таъминлаш муҳим ўрин тутишини таъкидлади.
Учрашув қатнашчилари Остона шаҳрида ўтган Вазирлар даражасидаги учрашувга мезбонлик қилгани учун Қозоғистон Республикасига миннатдорлик билдирди ва 2016 йили Брюсселда учрашишга келишиб олди.
Изоҳ (0)