“Навбаҳор”ни трансфер бўйича икки жиддий муаммо кутиб турибди — ЎзПФЛ

Ёзги трансфер ойнаси ёпилишига 9 кун вақт қолди. 30 июль санаси тугаши билан Лига мусобақаларида иштирок этаётган клублар учун футболчиларни рўйхатдан ўтказиш тизими ёпилади. Айни вақтда барча клублар Лига билан ўзаро шартномаларни мувофиқлаштириш устида иш олиб бормоқда. “Навбаҳор” клуби эса нафақат мазкур масала юзасидан кечикмоқда, балки икки муҳим муаммо билан ҳам юзма-юз келган. Бу ҳақда ЎзПФЛ матбуот хизмати хабар берди.

Биринчидан, “Навбаҳор” янги футболчиларни рўйхатдан ўтказиш ҳуқуқига эга эмас. FIFA собиқ футболчи Гиорги Никабадзенинг даъвосини қаноатлантирган бўлиб, клуб унга бўлган қарздорлигини тўламагунча, трансфер тақиқи жорий этилган.

Иккинчидан, жорий йилги қишки трансфер ойнасида “Навбаҳор” Жамшид Искандеров, Фаррух Сайфиев ва Жамшид Болтабоев олдидаги қарзларни тўлаши лозим эди. Кейинчалик Ўзбекистон футболчилари уюшмаси (ЎФУ) ҳамда футболчилар билан қарздорликни босқичма-босқич бартараф қилишга доир ҳужжат имзоланган. Бироқ ЎФУ 19 июль куни Лигага ва ЎФАга юборган хатда клуб ушбу келишувларга амал қилмаётганини билдирган. Шунингдек, бу каби ҳолатлар такрорлангани сабаб, Уюшма FIFA низомларига таяниб “Навбаҳор”дан 6 очкони олиб ташлаш талабини илгари сурган.

ЎзПФЛнинг маълум қилишича, ёзги трансфер ойнаси давомида “Навбаҳор” бир неча янги футболчини ўз сафига қўшиб олган. Бироқ уларни рўйхатдан ўтказиш масаласи ҳозирча очиқ қолмоқда. Клуб аввало FIFA тақиқини бекор қилиши, кейин эса ЎФУ билан тузилган келишувларга риоя қилиши ҳамда Лига олдидаги мажбуриятларини бажармоғи зарур.

Маълумот учун, 26 ва 27 июль саналари иш куни ҳисобланмайди. Бу эса “Навбаҳор”да вазиятни ҳал этиш учун атиги 7 иш куни қолгани дегани.

“Навбаҳор” жорий мавсумда барқарор натижалар қайд этмоқда ва клуб сиёсати йилдан йилга ижобий томонга ўзгариб бормоқда. Шундай экан, юқоридаги масалалар қисқа вақт ичида ҳал этилишига умид билдирамиз, дея қўшимча қилди Ўзбекистон Профессионал футбол лигаси.