Испаниянинг Виляхоёса шаҳридаги Cala Alta турар жой мажмуасида Украина Ички ишлар вазирлигининг уюшган жиноятчиликка қарши курашиш департаменти собиқ ходими, 61 ёшли Игор Грушевскийнинг жасади топилди. Бу ҳақда El Espanol нашри манбаларга таяниб хабар берди.
Грушевскийнинг жасади 29 июнь куни кечқурун у бир неча ой олдин квартира сотиб олган турар жой мажмуаси ҳовузидан топилган. Қўшнилар Грушевскийни ҳовузда ҳушсиз ҳолда кўришган. Уни сувдан чиқариб олишган, аммо на гувоҳлар, на етиб келган шифокорлар уни ҳаётга қайтара олишолмаган. Грушевскийнинг танасида зўравонлик аломатлари топилмаган, фақат бир қулоғидан қон оқаётган бўлган.
Таъкидланишича, қўшнилар Грушевскийнинг илгари Украина Ички ишлар вазирлигида ишлаганини билишмаган. Унинг собиқ полиция ходими экани журналистлар у ҳақидаги маълумотларни Украина реестрларидан топганидан сўнг маълум бўлган. Унда айтилишича, хусусан, Грушевский 1993 йилда Украина ИИВнинг Черкасск ва Кировоград вилоятлари уюшган жиноятчиликка қарши курашиш департаментининг юридик шахсларни рўйхатдан ўтказиш бўйича раҳбари ва ваколатли вакили бўлган. Мазкур бўлинма 2015 йилда полиция ислоҳоти доирасида тарқатиб юборилган.
Украина Ташқи ишлар вазирлигининг маълум қилишича, Украинанинг Барселонадаги бош консуллиги хабарига кўра, “Грушевскийнинг ўлими чўкиш оқибатида юз берган”.
Қайд этилишича, Виляхоёса ҳудудида кўплаб руслар ва украинлар истиқомат қилади. Айнан шу турар жой мажмуасида 2024 йил февраль ойида Украинага вертолётни олиб қочган россиялик учувчи Максим Кузминов отиб ўлдирилган эди.
Изоҳ (0)