Тошкент шаҳрининг олти туманидаги маҳалла ва мавзеларда намуна тариқасида видеокузатув мосламаларини ўрнатиш ва улардан фойдаланиш бошланди. Бу ҳақда Тошкент шаҳар ҳокимлигида 23 декабрь куни бўлиб ўтган матбуот анжуманида маълум қилинди.
«Видеокузатув мосламаларини ўрнатиш ва улардан фойдаланиш ишлари Тошкент шаҳрининг Миробод, Мирзо Улуғбек, Учтепа, Шайхонтоҳур, Чилонзор ва Яккасарой туманларида намуна тариқасида бошланди», — деди Коммунал фойдаланиш бирлашмаси бош директори Илҳом Маҳкамов «Дарё» мухбири саволига жавоб бераркан.
Қайд этишларича, Тошкент шаҳрида мавжуд кўп қаватли турар-жойларга, маҳалла ва мавзеларда ташқи видеокузатув мосламалари тижорат банкларининг имтиёзли кредитлари эвазига хусусий уй-жой мулкдорлари ширкатлари (ХУЖМШ) ёки ушбу фаолият билан шуғулланиш истагида бўлган бошқа корхоналар томонидан ўрнатилади.
Уларни ўрнатиш ва улардан фойдаланиш хизматлари учун тўловлар аҳоли билан тузиладиган шартномалар асосида бир неча йилларга бўлинган ҳолда, амалга ошириладиган эксплуатация харажатлари тўловлари билан уйғунлаштирилади.
Эслатиб ўтамиз, Тошкент шаҳар ҳокими 11 декабрь куни «Тошкент шаҳридаги кўп қаватли турар-жойлар, маҳалла ва мавзеларда видеокузатув мосламаларини ўрнатиш ишларини ташкиллаштириш чора-тадбирлари тўғрисида»ги фармойишни қабул қилгани ҳақида хабар берилган эди.
Изоҳ (0)