«Эътироф — 2015» миллий мукофоти совриндорларини тақдирлаш маросими 21 декабрь куни бўлиб ўтгани ҳақида хабар берилди, ғолиблар рўйхати келтирилди, фоторепортажлар тайёрланди.
Шоу-бизнес янгиликларига ихтисослашган аксарият онлайн-ресурслар ушбу тадбирни фаол, суратлари ва матнли трансляциялари билан ёритганига қарамай, унга асосан танқидий нуқтаи назар билан ёндашди. Айниқса, ёш хонанда Малика Эгамбердиеванинг «Йилнинг энг яхши аёл хонандаси» сифатида «Эътироф» мукофотига лойиқ кўрилгани бир эмас, бир неча манбалар томонидан кескин кутиб олинди.
«Нафақат томошабинлар, залдаги санъаткорлар ҳам ҳайратини яшира олмади. Манзура ҳам, Зиёда ҳам, Шаҳзода ҳам йўлда қолиб кетди. ‘Йилнинг энг яхши аёл эстрада хонандаси’ деб Малика Эгамбердиева эълон қилинди», — деб ёзади «Qalampir.uz». Нашрнинг қўшимча қилишича, шундан сўнг «Истиқлол» санъат саройида «Малика бу йил нима қилди?», «Концерт берди-ку» каби «шивир-шивирлар» бошланган.
«Менимча, Абдурашид Йўлдошев ва Малика Эгамбердиева миллий йўналишда соврин олиши керак эди... Кейинги йил тузукроқ бўлар, деб умид қиламиз. Рости, ёзгимиз ҳам келмади», — деб қайд этади «Shok.uz» сайти муаллифи. «Sayyod.com» эса мазкур масала қарийб бутун бир мақола бағишлаган. Нашрнинг ёзишича, бошқа номинациялар бўйича ҳам эътирозлар бор, «бироқ Маликага кўпроқ — чунки уни аксарият одамлар танимайди».
«Малика 2015 йилда 100 фоиз жонли концерт бергани, истеъдоди мукофотларга лойиқлигини эътироф этиш керак, аммо эстрада йўналишида у йил аёли эмасди», — деб ёзади сайт муаллифи. Муаллифнинг қайд этишича, одамлар Малика Эгамбердиеванинг оммалашган қўшиғидан ҳам аввал, унинг ўзини танимаяпти.
«Ҳеч ким Маликанинг иқтидори ва жонли ижрода куйлашини танқид қилаётгани йўқ. Жонли ижро борасида ёки йилнинг энг чиройли овози мукофоти берилганида бошқа гап эди. Унга ‘Йилнинг энг яхши аёл хонандаси’ мукофотини беришга ҳали жуда эрта эди. У ҳали шогирд мақомидаги, бирорта қўшиғи оммалашмаган жуда ёш ва, албатта, истеъдодли хонанда», — дейилади сайтдаги мақолада.
Маълумот учун, Малика Эгамбердиева 1990 йили Наманган вилояти Поп туманида туғилган. 2005 йили мақомчилар кўрик-танловида ғолиб бўлган, 2009 йили «Қалбимда Ватан» кўрик-танлови лауреати ва «Ягонасан Ватан» танлови учинчи ўрин соҳиби бўлган. 2010 йили «Ниҳол» мукофоти билан тақдирланган, 2013 йили эса асосий Наврўз тантаналари якунида Ўзбекистон халқ артисти Озодбек Назарбеков билан дуэт куйлаб чиққан. Ўзбекистон халқ артисти Гулсанам Мамазоитовани ўзига устоз деб билади.
Изоҳ (0)