Айни вақтда Лондонда истиқомат қилувчи ўзбекистонлик актёр Рашид Шадат «Юлдузлар жанги» киносагасининг янги — «Кучнинг уйғониши» эпизодида Жакку сайёраси вакили ролини ижро этди. Бу ҳақда MyDay хабар бермоқда.
«Фильмнинг бошида сайёрани босқинчилардан ҳимоя қилаётган жангчилардан бирининг ролини ўйнадим. Синовлар, кастинглар 5 ой давом этди. Ролга тасдиқланганимдан сўнг, фильм режиссёри Жей Жей Абрамс билан кўришдим. Мақоми жуда юқори бўлса-да, «юлдузлик касали»га чалинмаган, оддий инсон экан. Суҳбат давомида, бизнинг ролимиз эпизодик бўлса ҳам, муҳим эканлигини, шу сабабли жанг саҳнасида бор маҳоратимизни ишга солишни сўради», — деди Рашид Шадат.
«Жанг саҳнаси сайёрага тунда босқинчилар кемасининг қўниши билан бошланади. «Жанг»да фойдаланган қуролларимиз жуда қизиқ эди — худди ҳақиқийга ўхшар, отишма овозини чиқариб, лазерли олов пуркарди. Ҳаракатларим режиссёрга маъқул келди. У мендан орқа қатордан чиқиб, олдинги сафга туришни сўради ва: «Рашид, бу ерга туриб, бошқаларга жангда қандай ҳаракат қилиш кераклиги ҳақида буйруқ бер», — деди. Айтганини қилдим», — деди ўзбекистонлик актёр.
«Болалигимдан фантастикани яхши кўраман. Кичик рол ўйнаган бўлсам-да, болалик орзуимни рўёбга чиқардим. Тасвирга олиш жараёнидаги ҳамма нарса — декорациялар, персонажлар ва, албатта, муҳит ҳам фантастик эди», — деди Лондондаги Orzu Arts ўзбек театрида фаолият олиб бораётган актёр.
https://www.youtube.com/watch?v=BJ8BmFDH7_w
Рашид Шадат (Абдурашид Шодиев) Том Круз иштирокидаги «Бажариб бўлмас миссия», Жеймс Бонднинг саргузаштлари ҳақида ҳикоя қилувчи «Спектр» фильмларида ҳам кичик ролларни ижро этган. Рашид Шадат Ўзбекистонда «Илҳом» театрида ижод қилган, бир қатор миллий фильмларда, хусусан, «Хўжа Насриддин: ўйин бошланди» картинасида суратга тушган.
Маълумот учун, «Юлдузлар жанги»нинг янги эпизоди прокатнинг биринчи уик-эндида 528 миллион доллар ишлаб, йиғимлар бўйича жаҳон рекордини ўрнатгани ҳақида аввалроқ хабар берилган эди.
Изоҳ (0)