Наманганда яшовчи 118 ёшли Саъдияхон Иномова дунёнинг энг кекса аёлларидан бири ҳисобланади

«Namnews.uz» нашри дунёнинг энг ёши улуғ инсонларидан бири — 118 ёшли Саъдияхон Иномова Наманганда яшашини маълум қилди.

Саъдияхон Иномова 1897 йил Тўрақўрғон туманидаги Ёртепа қишлоғида дунёга келган. Бобоси Боймахсим эшон отаси Ҳамзахон қори бўлган бу аёлнинг умри меҳнат билан ўтди.Кетмончилик, ипак қурти парвариши, буғдой бошоғини териш, пахта териш, кўсак чувиш...

«Турмуш ўртоғи Исомиддин ота билан саккиз нафар фарзандни тарбиялаб, вояга етказди. Саъдияхон ая ҳозирда 45 набира, 141 нафар эвара, 139 чеваранинг момосидир. Турмуш ўртоғи Исомиддин ота 70-йиллар охирида вафот этган. Қарийб 45 йил ипак қурти боқди, ҳалол ризқ топиб, умргузаронлик қилди», — деб ёзади нашр.

Саъдияхон ая 2007 йилда «Шуҳрат» медали билан тақдирланган. Уч асрни кўрган бўлса-да, онахон ўз саломатлигидан нолимайди, китобни кўзойнаксиз ўқийди.

Олдинроқ жаҳоннинг энг кекса аёли 119 ёшли Моможон Романова Ўзбекистонда истиқомат қилаётгани хабар берилган эди. Бироқ Хоразм вилоятида яшовчи Моможон Романованинг кўрсаткичи халқаро миқёсда тан олинмаган.

АҚШда истиқомат қилаётган Сюзанна Мушатт-Жонс эса расман жаҳондаги нафақат энг кекса аёл, балки энг кекса инсон ҳисобланади (у 1899 йил 6 июль куни туғилган).