«Газета.uz»: Ўзбекистон фуқароларининг эски намунадаги паспортларини биометрик паспортга алмаштириш муддати 2018 йил 1 июлгача узайтирилди

Ўзбекистон фуқароларининг эски намунадаги паспортларини биометрик паспортларга алмаштириш муддати 2018 йил 1 июлгача узайтирилди. Бу ҳақда Ички ишлар вазирлиги хорижга чиқиш, келиш ва фуқароликни расмийлаштириш бошқармаси вакилига таяниб, «Газета.uz» хабар бермоқда.

Мазкур маълумот 19 декабрь, шанба куни Тошкент шаҳар ИИББ хорижга чиқиш, келиш ва фуқароликни расмийлаштириш бошқармасининг айрим бўлинмаларида ҳам тасдиқланган. «Газета.uz» манбасининг маълум қилишича, яқин кунларда паспорт алмаштириш муддатининг узайтирилгани ҳақида расман эълон қилинади.

Маълумот учун, Ўзбекистон Президентининг 2011 йил 5 январдаги «Ўзбекистон Республикасида паспорт тизимини такомиллаштиришга доир қўшимча чора-тадбирлар тўғрисида»ги фармонига мувофиқ, 2011 йилдан фуқароларга биометрик паспорт берилиши бошланган.

Эслатиб ўтамиз, олдинроқ биометрик паспорт олиш муддати узайтирилгани ҳақидаги овозалар рад этилгани тўғрисида хабар берилганди.