Испаниянинг Барселона шаҳри суди машҳур опера қўшиқчиси Монсеррат Кабальени фирибгарликда айблаб, олти ойлик қамоқ жазосига ҳукм қилди. 82 ёшли хонанда жазони шартли равишда ўташи тахмин қилинмоқда. Бу ҳақда «РИА Новости» хабар берди.
Кабалье суд мажлисида саломатлиги туфайли иштирок этолмади, кўрсатмаларни эса видеоалоқа орқали берди. Қамоқ жазосидан ташқари қўшиқчи 254 231 евро миқдорида жарима, 72 минг евро муддати ўтиб кетган тўловлар учун фоиз тўлайди, шунингдек, 1,5 йил давомида давлат ёрдамини ололмайди.
Кабалье 2010 йилда жисмоний шахс сифатида Испания ғазнасига солиқ тўламаганликда айбланмоқда. У расман Андорра фуқароси ҳисобланган ва бу ҳолат Испанияда солиқ тўламаслиги учун имкон берган. Бироқ прокуратура хонанда гўёки Андоррада яшаётганини солиқ тўламаслик учун ўйлаб топгани, аслида доимий равишда Барселонада истиқомат қилганини аниқлади.
Натижада Кабалье ўзини айбдор сифатида тан олиш, 250 минг евро жарима тўлаш, шунингдек, олти ойлик қамоқ жазосига ҳукм этилишига рози бўлди. Бундан ташқари, қўшиқчи Испания ғазнасига 508 минг еврони қайтарди.
Изоҳ (0)