Корея Республикаси ва КХДР 11 декабрь куни икки томонлама алоқаларни яхшилаш бўйича музокараларни бошлади, дея хабар бермоқда «ТАСС». Музокаралар Кэсон шаҳрида бўлиб ўтмоқда.
Жанубий Корея делегациясига бирлашув вазири ўринбосари Хван Бу Ги раҳбарлик қилмоқда, КХДР томонидан Кореяларни тинчлик йўли билан бирлаштириш қўмитаси котиблиги вице-директори Чон Чжон Су вакиллик қилмоқда.
«Ҳал қилиш керак бўлган кўп саволлар йиғилиб қолган. Уларни бирма-бир ечиш учун бор имкониятни ишга соламиз», — деди Хван Бу Ги Сеулда учрашувга кетишдан олдин.
Музокаралар кун тартиби ҳақида расмий ахборот йўқ, бироқ маҳаллий ОАВлар ёзишича, у Кимгансандаги сайёҳлик мажмуасини қайтадан ишга тушириш, Сеул томонидан Пхеньянга нисбатан жорий этилган санкцияларни бекор қилиш, ажратилган оилаларни доимий равишда учраштириб туриш каби масалалардан иборат бўлиши мумкин.
Изоҳ (0)