Uzbekistan Airways авиакомпаниянинг ахборот тизимлари хакерлар томонидан бузилиб, йўловчилар ва ходимлар ҳақидаги маълумотлар қўлга киритилгани ҳамда улар сотувга қўйилгани ҳақидаги хабарларни рад этди.
Daily Dark Web сайти даркнетдаги форумлардан бирида Uzbekistan Airways’га тегишли деб айтилаётган катта маълумотлар архиви эълон қилингани ҳақида хабар берган эди. Унда компаниянинг 400 минг йўловчиси ҳақидаги маълумотлар, молиявий транзакциялар, чипталарнинг тўлиқ маълумотлари, никоҳ гувоҳномалари, доимий мижозлар дастурларига аъзолик, паспортлар, ҳайдовчилик гувоҳномалари, туғилганлик тўғрисидаги гувоҳномалар ва бошқа ҳужжатларнинг сканерлари мавжуд. Шунингдек, йўловчилар ва ходимлар ўртасидаги ёзишмалардан олинган тахминан 500 мингта хабар ҳам сақланаётгани маълум қилинган.
Авиакомпания матбуот хизматининг билдиришича, ҳозирги вақтда ахборот тизимларига рухсатсиз кириш ёки йўловчилар ва ходимларнинг шахсий маълумотларини ошкор қилиш (компрометация) билан боғлиқ бирорта ҳам тасдиқланган ҳодиса қайд этилмаган. Барча инфратузилма одатдаги тартибда ишламоқда.
“Бир қатор нашрларда гўёки маълумотлар сизиб чиққанининг исботи сифатида келтирилган мисоллар ишончсиз ва ҳақиқатга тўғри келмайди. Материалларда кўрсатилган маълумотлар бизнинг ахборот тизимларимизга алоқадор эмас ва дастлабки тахминларга кўра, ҳодиса мавжудлиги ҳақида нотўғри таассурот қолдириш мақсадида сунъий равишда яратилган ёки таҳрирланган бўлиши мумкин”, дейилади раддияда.
Шунга қарамай, ахборот таҳдидларига жавоб бериш бўйича амалдаги тартиб-қоидалар доирасида, айрим оммавий ахборот воситаларида сиздирилган маълумотлар ҳақида хабарлар тарқалиши муносабати билан хизмат текшируви ўтказилган. Қайд этилишича, ҳеч қандай маълумотлар компрометация қилинмаганига қарамасдан, натижалар бундан кейин ҳимоя даражасини янада кучайтириш мақсадида қўлланилади.
Авиакомпания матбуот хизмати интернет майдон фойдаланувчиларидан жамоатчиликни чалғитиши ва авиакомпаниянинг ишбилармонлик обрўсига путур етказиши мумкин бўлган текширилмаган маълумотларни тарқатмасликни сўради.
Изоҳ (0)