Сирдарё вилояти Гулистон шаҳри ҳудудида учувчисиз учиш қурилмаларини ноқонуний олиб кириш, сотиш ва фойдаланиш ҳолатларини аниқлаш бўйича тезкор тадбир (рейд) ўтказилди. Бу ҳақда Электромагнит Мослашув Маркази хабар бермоқда.
Рейдлар Сирдарё вилояти Электромагнит мослашув хизмат ходимлари томонидан Ўзбекистон Республикаси Алоқа, ахборотлаштириш ва телекоммуникация технологиялари соҳасида назорат бўйича давлат инспекциясининг Сирдарё вилояти ҳудудий бўлими, Ўзбекистон Республикаси Давлат божхона қўмитаси Сирдарё вилояти бошқармаси, Гулистон шаҳар давлат солиқ инспекцияси, Сирдарё вилояти Ички ишлар бошқармаси, Ўзбекистон Республикаси Бош прокуратураси ҳузуридаги солиқ, валютага оид жиноятларга ва жиноий даромадларни легаллаштиришга қарши курашиш Департаменти Сирдарё вилояти бошқармаси вакиллари билан ҳамкорликда ўтказилди.
Тадбир давомида Гулистон шаҳри ҳудудида ноқонуний фойланилаётган тўрт комплект учувчисиз учиш қурилмалари (квадрокоптер) борлиги аниқланди.
Ушбу аниқланган қонунбузарлик ҳолати юзасидан учувчисиз учиш қурилмалари далилий ашё сифатида олиб қўйилиб, қурилмалардан ноқонуний фойдаланаётган шахсларга нисбатан Ўзбекистон Республикаси қонунчилигига мувофиқ қонуний чоралар кўрилди.
Шуни таъкидлаб ўтиш лозимки, Ўзбекистон Республикаси Вазирлар Маҳкамасининг 2014 йил 26 ноябрдаги «Ўзбекистон Республикасининг ҳаво бўшлиғида учувчисиз учиш қурилмаларидан санкциясиз фойдаланишда огоҳлантириш чора-тадбирлари тўғрисида»ги 322-сонли Қарорига асосан 2015 йилнинг 1 январидан бошлаб Ўзбекистон Республикаси ҳудудига учувчисиз учиш қурилмалари (ТИФТН коди 8802 20 000 0)ни олиб кириш, сотиш ва улардан фойдаланиш тақиқланган.
Изоҳ (0)