Қашқадарё вилояти маъмурий маркази — Қарши шаҳрида турли фильмлар ёзилган дискларни кўпайтириб, сотиш фаолияти билан ноқонуний шуғулланган икки йигит ва бир қиздан иборат гуруҳга чора кўрилди. Бу ҳақда «Ҳуқуқ» газетаси хабар бермоқда.
Газета хабарига кўра, улар сотган видеомаҳсулотлар орасида зўравонлик, шафқатсизликни тарғиб қилувчи ва порнографик мазмундаги фильмлар ёзилган дисклар ҳам бўлган.
Гуруҳнинг «ишлаб чиқариш жойи» ўрганилиб, дискларни сотишдан тушган 2 миллион сўм пул ҳамда «ишлаб чиқариш воситалари» сифатида хизмат қилган товар-моддий бойликлар ашёвий далил сифатида ҳужжатлаштирилди.
Суд гуруҳ раҳбарлик қилган шахснинг укасини Жиноят процессуал кодексининг тегишли моддаси бўйича, гуруҳга аъзо қизни эса Жиноят кодексининг 71-моддаси бўйича жазодан озод этди.
Гуруҳ раҳбари эса айбдор деб топилиб, иш ҳақининг 20 фоизи давлат даромади ҳисобига ушлаб қолингани ҳолда бир йил олти ойга ахлоқ тузатиш иши жазоси билан жазоланди.
Изоҳ (0)