Алан Милн ҳикояларидаги ўйинчоқ айиқча Винни-Пухнинг прототипи канадалик урғочи айиқ бўлган. Бу ҳақда Британиянинг The Independent газетасига таяниб, «Афиша-Воздух» хабар бермоқда.
Мақола Линдси Мэттикнинг янги «Виннини қидириб» китобига асосланган, китоб эса персонажнинг келиб чиқиш тарихи ҳақида сўзлайди.
Унда келтирилишича, 1914 йилда кичкина урғочи қора айиқ канадалик ветеринар Гарри Колберн томонидан қутқарилади, у айиқчага она шаҳри шарафига Виннипег (қисқартмаси — Винни) деб исм қўяди ва Лондон ҳайвонот боғига жўнатади. У ерда эса айиқ билан ёзувчининг ўғли Кристофер Робин танишиб қолади. Бола у билан иноқлашиб қолади ва ўзининг ўйинчоқ айиғини унинг номи билан атайди. Мэттик эса ўша халоскор ветеринарнинг эварасидир.
Ушбу қизиқарли факт аввалдан маълум бўлган, бироқ янги китобнинг чоп этилиши билан ХХ аср болалар адабиётидаги энг машҳур қаҳрамонлардан бирининг биографиясига қизиқиш уйғонган кўринади.
Изоҳ (0)