Афғонистон ҳудудида жойлашган Ҳиндикуш тоғларида 26 октябрь, душанба куни Тошкент вақти билан 14:09 да 7,5 магнитудали зилзила юз берди. Ер силкиниши кучи Ҳиндистон пойтахтидан тортиб, Россиянинг Новосибирск шаҳрига қадар сезилгани ҳақида хабарлар берилмоқда.
«Тошкент» марказий сейсмик станцияси ахборотига кўра, зилзила кучи Афғонистонга нисбатан яқин Термиз шаҳрида 5,5 магнитудани ташкил этган, Фарғона водийсида 3—4, Тошкент ва Самарқанд шаҳарларида эса 5 магнитудага тенг бўлган.
Қўшни мамлакатларда юз берган ерости силкинишлари Ўзбекистонда тез-тез сезилиб туради, бироқ 26 октябрдаги зилзила 2015 йилги шундай офатлар орасида ўзининг нисбатан кучлилиги ва давомийлиги билан ҳам айниқса ваҳимали бўлди — одамлар уй ва идораларини ташлаб кўчага чиқди, узоқдаги яқинларидан хавотир олган фуқароларнинг тинимсиз қўнғироқлари мобил алоқа сифатига таъсир кўрсатди.
2015 йил анча сокин бошланди. «Тошкент» марказий сеймсик станцияси фақат бир марта — Қирғизистонда 21 январь куни сезилган зилзила маркази Ўзбекистонда бўлгани ҳақидаги хабарларни рад этиб чиққанди, холос. Кейинги тўққиз ой давомида эса Ўзбекистонда камида олтита ер силкиниши сезилди.
2015 йил, баҳор
Нафақат Ўзбекистон ОАВлари, балки аксарият аҳоли ҳис қилган йилнинг биринчи зилзиласи 13 март куни Тошкент вилояти ҳудудида юз берди. Маркази Олмалиқ шаҳри яқинида бўлган ерости силкинишлари кучи 3 баллга тенг бўлгани маълум қилинганди. 20 май куни, тонг соат 8:33 да Тожикистонда юз берган 5,5 магнитудали ер силкинишининг кучи Ўзбекистонгача етиб келди.2015 йил, ёз
30 июнга ўтар кечаси Тошкентда 2 магнитудали зилзила қайд этилди — ер силкиниши маркази, Афғонистоннинг Ҳиндикуш тоғларида унинг магнитудаси 5,5 га тенг бўлган. 10 август куни Афғонистондаги 6 магнитудали ер қимирлаши Тошкент, Андижон, Фарғона, Самарқандга 2, Шоҳимардонга 3, Термизга 3—3,5 магнитуда билан етиб борди.2015 йил, куз
23 сентябрь куни Қирғизистонда, Тошкентдан 350 километр узоқликда 4,7 магнитудали зилзила юз берди. Унинг кучи Наманганда 2, Фарғонада 3, Андижонда 2,5 баллни ташкил этди. 26 октябрда юз берган ер қимирлаши юқоридаги ҳисоботни тайёрлаш учун асос бўлди.Қайд этиш жоиз, ўзбек олимлари яқин йилларда Ўзбекистонда кучли зилзилалар юз бериши кутилмаётгани ҳақида йил давомида камида икки марта баёнот берди. «Ўзбекистон Фанлар академияси Сейсмология институти мутахассислари томонидан ер қаърининг ҳолати йил бўйи мониторинг қилиниб турибди, у 20 та турли параметрлар бўйича олиб борилади. Айни пайтда сейсмик фаоллик кучайганидан далолат берувчи аломатлар кузатилмаяпти», — деганди институт директори ўринбосари Аҳмаджон Тўйчиев.
Изоҳ (0)