Мексиканинг Тинч океани соҳилларига яқинлашиб келган бешинчи туркумга оид «Патрисия» бўрони юқори даражада хавфли бўлиб, катта вайронгарчиликларга сабаб бўлиши мумкин. Бу ҳақда, «ТАСС» хабарига кўра, Мексика президенти Энрике Пеня Нето маълум қилди.
Шунга қарамай, давлат раҳбарининг алоҳида қайд этишича, Мексика табиий офат зарбасига тайёр. Хабар беришларича, дастлаб Мексиканинг Халиско штатига ёпириладиган бўрон вақтида шамол тезлиги сониясига 90 метрдан 111 метргача етиши кутилмоқда.
«Биз тайёрмиз. Бу бўрон қандай зарар етказишини олдиндан айтиш қийин, бироқ биз бу қадар катта хавф соладиган бўронга қарши ҳеч қачон дуч келмаганмиз», — деди президент.
Унинг сўзларига кўра, агар Саффир-Симпсон шкаласи бўйича бўронларнинг олтинчи туркуми бўлганида, «Патрисия»ни бемалол шу гуруҳга киритса бўларди. Пеня Нетонинг қайд этишича, бундай хавф вақтида «ҳаракатларни мувофиқлаштириш, биргаликда ишлаш ва ҳар қандай вазиятга тайёр туриш керак».
Мексика ҳукумати бўрондан жиддий зарар кўриши мумкин бўлган ҳудудларда аҳолини оммавий равишда кўчирмоқда. Табиий офат Мексиканинг Халиско, Колима, Наярит, Сакатекас ва Коауила штатларига ёпирилиши ва ҳатто АҚШ ҳудудига қадар етиб бориши тахмин қилинмоқда.
Соҳилбўйи минтақаларига минглаб ҳарбийлар ва қутқарувчилар юборилган, одамларни қабул қилиш учун 1,7 мингдан ортиқ пана жой тайёрлаб қўйилган. Халиско, Колима ва Наярит штатларида 130 касалхона бўрон оқибатида жабрланганларга ёрдам кўрсатишга тайёр.
Изоҳ (0)